Орталықтың бел ортасында орналасқан голограммадан төрт өңірдің белгілі өкілдерінің орындауында танымал ән-күйлер мен жырларды тыңдауға болады. Ал келесі мультимедиялық залда қазақ халқының сан ғасырлық өнері мен мәдениетіне саяхаттай отырып, әр өңірде сақталған музыкалық өнеріміз бен бай рухани-мәдениетіміздің терең тарихымен танысатын боласыз.
Дәстүрлі музыка орталығында сексенге жуық экспозиялар қойылған. Орталық экспозиясы Ықылас атындағы халық музыкалық аспаптар музейі қорында сақтаулы тұрған қазақтың танымал өнер тұлғаларының жәдігерлерінен жасақталды. Экспонаттар қазақтың белгілі өнер тұлғаларының жәдігерлерінен тұрады. Экспонаттар өңірлік төрт мектепке жіктеліп орналасқан:
Арқа әншілік, сал-серілік және күйшілік мектебінің аспап жәдігерлері.
Жетісу әншілік, жыраулық-жыршылық және күйшілік мектебінің аспап жәдігерлері.
Батыс әншілік, жыраулық-жыршылық және күйшілік мектебінің аспап жәдігерлері.
Оңтүстік және Сыр бойы әншілік, жыраулық-жыршылық және күйшілік мектебінің аспап жәдігерлері.
Орталықта Жетісудің жүйріктері Жамбыл мен Кененнің, Сырдың саңлақтары Нартай мен Мырзабектің (Қызыл жырау), Батыс ән-күй мектебінің көрнекті өкілдері Дина мен Махамбеттің, Арқа әншілік мектебінің тұлғалары Абай мен Біржан салдың домбыралары бар. Сонымен қатар, бұл орталықты Елбасы арнайы келіп ашып, домбырасын сыйлап, белгілі күйші Дина Нұрпейісованың мүсінін орталыққа сыйға тартқан болатын. Ұлттық жәдгерлерді насихаттау мақсатында студенттер мен мектеп оқушыларына, сондай-ақ қала түрғындары мен қонақтарына арнайы экскурсиялар ұйымдастырылып тұрады. Мәліметтермен http://kazmuscenter.kz сайтынан танысуға болады.
АЛМАТЫ
