Әрине, бөрік деген сөз бәрімізге ұнайды. Ол, әсіресе, біздің мынау шағын әңгімемізге ерекше көрік беріп тұрар еді. Қараңызшы: «Бас пен бөрік». Қандай жарасымды!
Бірақ біздің басқа бөрік қонбағалы қаш-шан. Сондықтан да, бүгінгі сөз – кәдімгі қарапайым қалпақ туралы ғана болмақ.
Ең басты мәселе, сол құрымағырдың қайта-қайта бастан түсіп қала беретіндігі ғой.
Нақтысын айтсам, жиі-жиі жоғалтамын. Жылы жерге кірген бойда ұмытам. Қашан шешіп, қайда қойғанымды білмеймін. Тек басым жаурағанда ғана есіме түсіп, қап деп санымды бір соғамын. Бірақ кеш...
Содан соң, амал жоқ, тағы да жаңа қалпақ сатып алуға тура келеді. Шынымды айтсам, базарға барған сайын ең арзанын таңдаймын. Себебі арзан нәрсені жоғалтсаң, оның өкініші де арзандау болады.
Иә, иә, сіз ойлағандай, қымбат қалпақ та алып көрдім. Бірақ, қымбат дүниені ұмыту қиын деген сөздің өзі де, расын айтсам, шындықтан алыстау ма деп қалдым. Себебі жылы жерге барған бас сол баяғысынша былжырап, бәрібір ұмытып кете береді. Сондықтан қымбат қалпақтың өзінен гөрі өкініші әлдеқайда қымбатқа түседі.
Оның үстіне қайта-қайта жоғалтып, қайта-қайта жаңасын сатып ала берген соң арзан қалпақтың өзі де отбасылық бюджеттің бір шетін оңдырмай опырып кетеді. Енді не істесем екен?..
«Бұған өзі, бас кінәлі ме, қалпақ кінәлі ме?»
Міне, осындай сұрақ туған соң, оған әрине, жауап іздейсің. Есіңе қайдағы-жайдағылар түседі.
Әне, сол кезде ойлайсың, әй, осы, ұмытшақ бас пен қалпақтың арасындағы байланыс секілді тұрақсыз қарым-қатынас кейбір адамдардың арасында да бар-ау деп.
Өйткені біреуді біреудің әлгі қалпақ секілді қажет кезінде ғана пайдаланып, қажет емес кезінде тез-ақ ұмытып кететінін күнде болмаса да, күнара көріп жүрміз емес пе.
