«Nur Otan» партиясы Түркістан облыстық филиалының ұйымдастыруымен, Қазығұрт ауданы әкімдігі қолдауымен басталған игі іс барысында елге танымал өнерпаздар мен саяси ұйым өкілдері алдымен Жаңабазар ауылындағы қымызханада аудан ақсақалдарымен кездесті. Елдік мәселелер қозғалған кездесуде қазыналы қарттар арнайы келген азаматтарға ақ батасын берді. Өнерпаздар ел ағаларына әннен шашу шашып, ақындар арнауларын айтты. Ал аудандық мәдениет үйінде еркін форматта өткен өнер кешінде партия филиалы төрағасының орынбасары Қалыйма Жантөреева жобаның мақсатымен таныстырды. Жоба келесі жылы тұтас облысты қамтып, шалғайдағы елді мекендер де өнермен сусындайтынын, ел арасынан талантты жастар да шығатынын жеткізді.
Өнер кешінде поэзия әлемінде өзіндік қолтаңбасы қалыптасқан ақындар Ақмарал Леубаева, Айдар Сейдәзім мен Мұқағали Кенжетайұлы жалынды жырларымен көпшіліктің көңілінен шыға білді. Ал Бөрібай Оразымбетов пен Кәрима Оралованың айтысында қоғамдық мәселелер де қозғалды. Қазығұрт ауданының талантты өнерпаздары өз өнерлерімен көрерменді тәнті етті.
Түркістан облысы
