Биыл облыс бойынша АӘК көрсету мақсатында жалпы 70,8 млрд теңге бөлінген, оның ішінде республикалық бюджеттің үлесі – 65,7 млрд теңге. Атаулы әлеуметтік көмек 100 мыңнан астам отбасындағы 632,8 мың адамға тағайындалған. Бұл өткен жылмен салыстырғанда үш есе көп.
Облыс әкімі Өмірзақ Шөкеевтің төрағалығымен өткен аппарат мәжілісінде облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева осындай деректерді келтірді. Атаулы әлеуметтік көмек көрсетудегі соңғы мәліметтер мен орын алған кемшіліктер талқыланған жиында қайта есептеулердің уақтылы жүргізілмеуі, құжаттардың дер кезінде өңделмеуі, бюджет қаржыларының дұрыс жоспарланбауы және алдын ала бір жылдық АӘК төленуі олқылықтарға себеп болғаны айтылды. Осыған байланысты аудан, қала әкімдері жылдың соңына дейін қаржының мақсатты және заң шеңберінде төленуін жете бақылауға алуы қажет.
Түркістан облысы
