Полицей формасын киген бірнеше ондаған тәліптер сейсенбіге қараған түні Пәкстанның солтүстік батысындағы Дера-Исмаил-Хан қаласындағы түрмеге шабуыл жасады. Соның салдарынан жүздеген тұтқын қашып кеткен. Бұл түрмедегі бес мың тұтқынның ішінде ондаған тәліптер мен тыйым салынған радикалды топтардың содырлары бар.
Американың бірқатар штаттарында фастфуд индустриясы қызметкерлерінің ереуілі болып өтті. BurgerKing, McDonald’s және Wendy’s жедел тамақтану ресторандарының наразылық білдірген қызметкерлері өз отбасыларымен бірге көшелерге шығып, компания басшылығынан жұмыс сағатына төленетін ақыны 7,5-тен 15 долларға дейін өсіруді талап етті.
Швейцарияның Гранж-пре-Марнан қаласы маңында соқтығысқан пойыздардың бірінің машинисі қираған локомотивтің ішінен өлі күйінде табылған. Оның қаза тапқаны мүрдені ашу процедурасынан кейін ресми расталмақ. Екінші машинист апаттан жарақат алғанымен, тірі қалған көрінеді.
Ирактың астанасы Бағдад пен Басра қаласында бірнеше дүркін жарылыстар орын алған. Алдын-ала хабарланған мәліметтер бойынша, жарылыс салдарынан 48 адам қаза тауып, 220 адамның түрлі дене жарақаттарын алғаны белгілі болып отыр. Тек Бағдадтың өзінде ғана мина қойылған 11 автомобиль жарылған, олардың бесеуі мұсылман-шииттер тұратын аудандарда орын алған.
Тунис үкіметі елде жалғасып жатқан саяси дағдарыстың одан бетер шиеленісе түсуіне қарамастан отставкаға кетуге ниетті емес. Орын алған тәртіпсіздіктерге байланысты елдің премьер-министрі Али Лараед ұлттық теледидар арқылы сөз сөйлеп, біз билікке жармасып отырған жоқпыз, бірақ біздің алдымызда міндеттер тұр, ал, біз олардың атқарылуы үшін жауаптымыз, деп атап көрсеткен.
Алдын ала бағалаулар бойынша, Канн қаласындағы Carlton қонақ үйіндегі көрмеден ұрланған бриллианттардың құны 103 миллион еуроны құрайды. Бұл тек осы өңір тарихындағы ғана емес, сонымен бірге бүкіл әлем бойынша көлемі жағынан ең үлкен ұрлық болып отыр. Күзетшіні тапаншамен қорқытқан тонаушы асыл тастар толған чемоданын алып, қонақ үйден жайбарақат шығып кеткен көрінеді.
Грузияның мәдениет министрі Иосиф Сталиннің ескерткішін оның туған қаласы Гориге қайтару жөнінде шешім қабылдады. Ведомство осылайша кеңестік көсем ескерткішін қайта қалпына келтіру туралы қалалық жиналыстың ұсынысын қанағаттандырды. Ескерткіш Сталиннің туған күніне орай 21 желтоқсанда қалпына келтірілетін болады.
Мәскеу базарларында дүйсенбі күні басталған полицейлердің профилактикалық операциясы барысында қазірдің өзінде 470-тен астам адам қамауға алынған.
Ақпарат агенттіктері материалдары негізінде әзірленді.
