Төленген берешектің сомасы 17,1 млрд теңге, ал есептен шығарылған өсімақылар мен айыппұлдар – 6,2 млрд теңге. Негізгі борышты бюджетке төлеу кезінде 2019 жылдың басынан бастап 14, 584 млрд теңге мөлшерінде негізгі борыш сомасы төленді.
Мемлекет басшысының салық рақымшылығы туралы тапсырмасы кәсіпкерлікке көрсетілген мемлекеттік қолдаудың бірі, бұл бизнеске жұмысты таза парақтан бастауға мүмкіндік беріп отыр.
Салық рақымшылығы қорытындысына келсек, жалпы республика бойынша кәсіпкерлік субъектілерінің арасында барлығы 41 183 салық төлеуші 8,3 млрд теңге берешегін өтеді. Бұл ретте есептен шығарылған өсімақылар мен айыппұлдар сомасы 2,9 млрд теңгені құрады. Сонымен қатар тамыз айынан бастап рақымшылық жасау салық заңнамасындағы құқық бұзушылықтардың алдын алды.
Осылайша, салық рақымшылығы арқылы 2 999 салық төлеуші 8,8 млрд теңге көлеміндегі берешекті өтеп, мүмкіндіктерін пайдаланды. Олардың 3,4 млрд теңге өсімпұлы мен айыппұлы кешірілді.
Жоғарыда атап өткеніміздей, рақымшылық науқаны аясында шағын және орта бизнесті кәсіп еткен 44 182 адам 17, 1 млрд теңге берешек төлеп, 6,2 млрд теңге өсімақы мен айыппұл есептен шығарылды.
Аймақтарға бөліп қарастырар болсақ, салық рақымшылығын белсенді пайдаланған кәсіпкерлердің тізімі келесідей 6 513 шағын және орта бизнес субъектісі Алматы қаласына тиесілі. 5 196 салық төлеуші бар Түркістан облысы екінші орында тұр. Сәл қалыс қалған Алматы облысы (5 054 салық төлеуші) үштікті түйіндеді. Елордада рақымшылықтың игілігін пайдаланғандардың саны – 3 729 адам. Сондай-ақ өсімақылар мен айыппұлдардың ең көп сомасы Алматыда тіркелген, бұл шамамен 1,1 млрд теңге. Бұдан кейін Ақтөбе облысы, Нұр-Сұлтан қаласы және Қостанай облысы жайғасқан.
Мемлекеттік кірістер комитетінің бастамасымен Нұр-Сұлтан, Алматы, Өскемен, Шымкент және Атырау қалаларында салық төлеушілерге семинарлар өткізіліп, салаға қатысты проблемалар мен ұсыныстар айтылды.
Естеріңізге сала кетейік, ағымдағы жылдың соңына дейін салық бойынша берешектерді төлеу қажет. Салық төлеушілер салық бойынша берешектің бар-жоғын келесі сілтеме бойынша біле алады: http://kgd.gov.kz/ru/app/culs-taxarrear-search-web.
Жоғарыдағы статистикадан аңғарғанымыздай, рақымшылықтың игілігін көрген ел азаматтарының саны аз емес. Оны еліміздің іскер ортасы да құп көріп отыр. Ең бастысы, бұл жұмыс осымен тәмамдалып қалмаса игі.
