Ауылдық округке қарасты Шуйское, Макеевка, Третьяковка елді мекендері мұнтаздай таза жинақылығымен, бақуатты тіршілігімен ерекшеленеді. Шуйское ауылында дәрігерлік амбулатория, мәдениет үйі, кітапхана, пошта бөлімшесі мүлтіксіз жұмыс істеп тұр.
Округте «Шуйское-ХХІ», «Әлем 777», 9 шаруа қожалығы, он шақты жеке кәсіпкер жұмыс істейді. Осы ұжымдардың ішінде туған өлкенің төсін көркейтуге, округтегі ауылдардың ажарын келтіріп, шырайландыруға толымды үлес қосып жатқан «Шуйское-ХХІ» серіктестігінің басшысы Алтынбек Құрманқұловты бөле-жара атауға болады. Алтынбек Бейсембекұлы биылғы жылдың өзінде Шуйское ауылынан Макеевкаға баратын 8 шақырым тас жолды 13 миллион теңгеге жөндеп берді. Жақын да болса алыс жол еді. Сегіз шақырымның өзі сілеңді қатырып, сергелдеңге түсіретін. Қазір атқан оқтай түп-түзу жолдың рахатын көріп отырмыз, дейді екі елді мекеннің тұрғындары.
Серіктестік 23 423 гектар жерге дәнді дақылдар тұқымын себеді. Бұл өлкенің топырағы өте құнарлы. «Жетек шаншысаң, арба өсіп шығады» дейтіндей-ақ майы бетіне шығып тұрған жер. Арқадағы ауа райы анау айтқандай қолайлы бола қоймаған жылдардың өзінде гектар берекесін 15 центнерден айналдырады. Агротехникалық шараларды уақтылы атқарудың, ортақ іске күш-қуаттарын, қайрат-жігерлерін аямай жұмсаудың жемісі. Өйткені ауыл еңбеккерлері нәтижелі еңбек етсе игілігін өздері көретінін жақсы біледі. Бұл жерде арқаны кеңге салып жүрдім-бардым жұмыс істеу жоқ. Шаруашылықтың қай ісіне болсын қайраққа жанып алғандай қылпып тұратын бесаспап мамандар белдерін бекем буып кірісіп кетеді. Серіктестік диқандары биыл да діттеген межеге жетті. Күздің қара жаңбырымен алысып жүріп маңдай термен өскен дәннің бір түйірін ысырап қылмай, қамбаларына құйып алды. Бидайдың әр гектарынан 14,7 центнерден өнім жинаса, арпаның шығымдылығы әр гектарына 18,2 центнерден айналды. Серіктестік жалғыз егін шаруашылығының ырыздығын еміп қана қоймай, мал шаруашылығын дамытуға да күш салуда. Маусымдық жұмыстармен шектелсе, ауыл тұрғындарын қысы-жазы қол үзбей істейтін жұмыспен қамтамасыз ете алмас еді. Онда табыстың тайқазаны да дәл осылай қайнамайды. Жұмысшылардың да еңбекақысы тақыл-тұқыл болар еді. Ал қазір қай уақытта да қол қусырып қарап отыратын адам таба алмайсыз.
Бағымда 710 ірі қара бар, жылқының саны 500-ге жуық. Жыл ішінде 13 тонна ет өндіріп, 1340 тонна сүт сауған. Серіктестік жұмысшыларының айлық жалақысы орташа есеппен 116 000 теңгені құрайды. 120-ға жуық адам қысы-жазы жұмыспен қамтылып отыр.
Тәп-тәуір дәулет жинаған серіктестік бар табысын бауырына басып қалмай, ел қамын жеп отырғанын көргенде көзің сүйсініп, көңіліңді қуаныш билейді. Өзге жерлердегі өрендер де ел қамын Алтынбек Бейсембекұлы тәрізді ойлай жүрсе ғой.
Ауылды абаттандыруға, көшет отырғызуға, жарықтандыруға 20 миллион теңге қаражат бөліпті. Ауылдағы орта мектептің асханасын жөндеп, өртке қарсы құрылғылар орнатуға 300 мың теңге берген. Мәдениет үйінің көркемөнерпаздар үйірмесінің мүшелеріне қажетті әрқилы костюмдер мен басқа да құрал-жабдықтар сатып алуға 570 мың теңге көлемінде көмек көрсеткен. Көп балалы аналар мен Ауған соғысының ардагерлеріне, сондай-ақ «Мектепке жол» акциясы бойынша қажетті шаруаларға 2 908 мың теңге жұмсаған. Ауыл тұрғындарының айтуына қарағанда, серіктестіктің шарапаты тигелі оқта-текте бой көрсетіп қалатын басбұзарлық та пышақпен сылғандай сап тыйылған. Көршінің кетпенін қолтығына қыса кететін қолы сұғанақтар да аяқтарын тарта бастапты. Өйткені ауылдың төрт тарабын тегіс бейнебақылау жүйесі кірпік қақпай қадағалап тұр. Бұл орайда серіктестік 1 238 мың теңге қаражат жұмсаған. Ең бастысы, бейнебақылау да емес, адамдардың иманды сезімдері қалыптасып, арлы адалдықтың бастауы негізін қалаған. Мектеп оқушыларының ыстық аспен қамтамасыз етілуіне 888 мың теңге көлемінде көмек көрсеткен.
Бұл өлкеде көптен бері күрмеуі шешілмей келе жатқан мәселелер де баршылық. Оның бірі – жол мен ауыз су. Серіктестік округ аумағына кіретін жолдарды 130 миллион теңгеге жөндеп берген. Ауыз толтырып айтатын-ақ қамқорлық емес пе?! Ел ішінде отырып жердің игілігін көрген соң қайтарымын жерлестерім көрсін деген ақ адал ниеттің нәтижесі десек, артық айтқандық емес шығар. Ауылдастарына ақжарылқап көңілмен демеу болып отырған серіктестік жұмысшыларына да тәп-тәуір жағдай жасайды. Мәселен, серіктестік жұмысшыларын тегін тамақтандыруға 2 054 мың теңге қаражат бөлсе, зейнеткерлерге 1 182 мың теңге көлемінде көмек көрсетіпті.
Сан қырлы шаруаның басын біріктіріп, игілікті істерге ұйытқы болып отырған серіктестікке бесаспап маман кадрлар да керек. Шеттен кімді әкелерсің, қай істің маманы болсын өз ортасынан шығады. Бірақ оларды талапқа сай болуы үшін қайта даярлап, оқыту керек. Даярлықты тілейтін жұмыс та аз емес. Мәселен, серіктестік жыл сайын машина-трактор паркін жаңартып, шетелдік өнімді техникаларды алдыруда. Басқа да қажеттіліктер жетіп-артылады. Бүгінгіні ғана ойламай, келешектің көкжиегіне қадам басуды мұрат тұтқан ұжым бір миллион теңгеге мамандарды қайта оқытып даярлаған.
– Селодағы бір зейнеткер әлдебір себептермен пайына тиесілі астығын ала алмаған екен, – дейді округ әкімі Әсия Тоқжұманова, – Алтынбек Бейсембекұлымен хабарласып едім, сөзге келген жоқ, тиесілі астығын берді. Басқа уақытта да бұйымтайын айтқан жерлестерінің бетін қайтарып көрген емес.
Ел тегі осындай ерлердің арқасында еңсе түземек.
Ақмола облысы,
Атбасар ауданы
