Жапония үкіметі Ақмола облысындағы Есіл аудандық ауруханасына халықаралық «Шөп тамырлары» бағдарламасы бойынша грант бөлетін болды. Соның арқасында медицина жабдықтарын жаңғырту және мекеменің материалдық-техникалық базасын нығайту жобалары бойынша 31 миллион теңгеден астам қаржы есілдіктер игілігіне жаратылмақ.
Жаңа жабдықтар алдағы тамыз-қыркүйек айларында жеткізіледі деп күтілуде. Аса қажет құралдардың ішінде қанның биохимиялық сараптамасын жеделдететін коагуломтрлер, КФК-5 фотометрі, тіс емдеу жабдықтары, «ЛОР-комбайндар», сәуле шашыратқыш шамдар, электрокардиограмма мониторингі, перзентхана әмбебап кереует-трансформері, тағы басқалары бар. Мамандар бұл жабдықтар аудан тұрғындарына медициналық көмек көрсетудің сапасын арттыратынын айтып отыр.
«Шөп тамырлары» қайтарымсыз бағдарламасы Қазақстанда 1997 жылдан бастап жүзеге асырылып келеді. Ол шағын ауқымдағы әлеуметтік жобаларды қолдауды көздейді және қарапайым халықтың қауіпсіздігін қамтамасыз етуді мақсат санайды.
Бақберген АМАЛБЕК,
«Егемен Қазақстан».
Ақмола облысы,
Есіл ауданы.
