Айта кету керек, депутаттар жаңа 2020 жылы алғаш рет жиналды. Осыған назар аударған Н.Нығматулин биылғы жыл әдеттегідей аймақтарды аралаудан басталғанына тоқталды.
«Барлық үш фракцияның депутаттары және Ассамблея атынан сайланған депутаттар облыс орталықтарына ғана емес, аудандарға, қалаларға, алыс ауылдарға іссапармен барды. Әрбір депутат жергілікті тұрғындарға елімізде, Мәжілісте атқарылып жатқан жұмыс жөнінде баяндап берді. Аймақтарда әлеуметтік көмектің жаңа форматы, Денсаулық сақтау кодексі, жұмыспен қамту туралы және тағы да басқа мәселелер көтерілді. Осы кездесулерде айтылған барлық ұсыныстарды, пікірлерді алдағы заң шығару жұмысымызда ескереміз», деді Мәжіліс Төрағасы.
Палата спикерінің сөзіне қарағанда, қазіргі таңда Мәжілісте 61 заң жобасы жатыр. Осы сессияның аяғына дейін тиісті тапсырмаларды іске асыру үшін бірқатар маңызды заң жобасын мақұлдау керек.
Жалпы отырыста Мәжіліс соғыс жағдайы мәселелері бойынша түзетулерге қатысты заң жобасын бірінші оқылымда мақұлдады. Бұл құжатты қабылдау еліміздің қауіпсіздігіне төнетін қатерге жол бермеу үшін қажет.
Заң жобасының негізгі мақсаты – мемлекеттің соғыс жағдайында жұмыс істеуі, бейбіт уақытта оған дайындалу мәселесін құқықтық реттеу. Сондай-ақ құжатта Президент өкілеттігін толықтыру ұсынылып отыр.
«Соғыс жағдайында жергілікті атқарушы органның өкілеттігін қарастырып, оларға «облыстың, республикалық маңызы бар қаланың, астананың қорғаныс кеңесін» құруға құзырет беру ұсынылады. Бұл ретте әскери басқару органы ретінде қорғаныс кеңестері соғыс жағдайында әрекет етпек. Олар тек соғыс жағдайында құрылады, сондықтан Қарулы Күштер құрылымына кірмейді», деді осы заң жобасы бойынша баяндама жасаған Қорғаныс министрінің бірінші орынбасары – Қарулы күштер Бас штабының бастығы Мұрат Бектанов.
Бұдан бөлек, жалпы отырыста депутаттар «Байқоңыр» кешенін газбен жабдықтау туралы Ресеймен арадағы үкіметаралық келісімді ратификациялады. Бұл келісімнің нәтижесінде Байқоңыр қаласының тұрғындары қолжетімді, қымбат емес және экологиялық таза табиғи газбен тұрақты қамтамасыз етілмек.
«Келісім «Байқоңыр» кешенін газбен қамтамасыз етудің құқықтық негіздерін айқындауға бағытталған және тұтынушыларды сұйытылған мұнай газынан табиғи газға көшіруді көздейді. Бұған дейін Байқоңыр қаласын газбен, яғни сұйытылған мұнай газы немесе пропан-бутанмен жабдықтау үшін ресейлік «Газовое хозяйство» кәсіпорны жауапты болған», деді Энергетика министрі Нұрлан Ноғаев.
Байқоңыр қаласына газ жеткізуді «ҚазТрансГаз Аймақ» акционерлік қоғамы жүзеге асырады. Сондай-ақ жабдықтау жүйелерінің қауіпсіздігіне жауап береді және шарт жасасу, баға белгілеу, өнеркәсіптік қауіпсіздік мәселелері Қазақстан Республикасының заңнамасына сәйкес жүзеге асырылады.
«Үкіметаралық келісімге сәйкес, «ҚазТрансГаз Аймақ» АҚ-ға қала аумағында және «Байқоңыр» ғарыш айлағына табиғи газ жеткізу құқығы беріледі. Бұл қызмет ресейлік салық органдарында тіркелмей жүзеге асырылады. Яғни, қосарланған салық салуға жол берілмейді. Келісімде Байқоңыр қаласының аумағында табиғи газды бөлшек саудада өткізу бағасы Қызылорда облысының газ тұтынушылары үшін Қазақстанның монополияға қарсы органы белгілейтін бағаға сәйкес келуі тиіс деп бекітілген», деді ведомство басшысы.
Министрдің сөзіне қарағанда, қазіргі таңда Байқоңыр қаласы және Қызылорда облысындағы табиғи газдың бөлшек бағасының бір текше метрі жеке тұлғалар үшін – 18,6 теңгені, заңды тұлғалар және бюджеттік ұйымдар үшін бір текше метрі 18,9 теңгені құрап отыр.
«Байқоңыр қаласы тұрғындары тамақ әзірлеу үшін бір пәтер орташа есеппен 3-4 текше метр сұйытылған газ немесе шамамен 6-10 текше табиғи газ тұтынады. Табиғи газды қосқан жағдайда, тұрғындар осы көлемдегі газ тұтынғаны үшін 111-186 теңге төлейді. Бұл – сұйытылған мұнай газынан 16 есе арзан. «ҚазТрансГаз Аймақ» АҚ мен «Газовое хозяйство» кәсіпорнының бірлескен жұмысының нәтижесінде Байқоңыр қаласының барлық көпқабатты секторы, яғни 328 тұрғын үй, сондай-ақ 150 жеке үйдің 45-і табиғи газға қосылған», деді Н.Ноғаев.
Осы келісім тұрғындар үшін коммуналдық қызмет шығындарын азайтуға мүмкіндік береді. Себебі сұйытылған газға қарағанда табиғи газдың құны айтарлықтай арзан. Бұдан басқа, Байқоңыр қаласында газды бөлу инфрақұрылымы салыстырмалы түрде жаңа.
Сонымен қатар жалпы отырыста Мәжіліс 16 заң жобасын жұмысқа алды. Оның ішінде, Экологиялық кодекс, асыл тұқымды мал шаруашылығы, мәдениет мәселелері бойынша, мемлекеттік фельдъегерлік байланыс туралы басқа да өте маңызды заң жобалары қамтылған.
Жалпы отырыста Мәжіліс депутаты Ерлан Дауылбаевты Қазақстан Республикасы Орталық сайлау комиссиясының мүшесі қызметіне тағайындады.
«Ерлан Сламханұлы көп жылдар бойы әділет саласында жұмыс істеді. Орталық сайлау комиссиясы жүйесінде де қызмет етті. Соңғы уақытта Шымкент қалалық аумақтық сайлау комиссиясының төрағасы болды», деді Мәжіліс төрағасы Н.Нығматулин.
Мәжілістің Заңнама және сот-құқықтық реформа комитеті төрағасы Нұрлан Әбдіров өз сөзінде Е.Дауылбаев жоғары біліктілігі бар заңгер екенін атқарған жұмыстарында дәлелдегенін атап өтті.
Жалпы отырыс соңында бірқатар депутаттар құзыретті органдарға депутаттық сауалдар жолдады.
