Қоғам • 22 Қаңтар, 2020

Ақтық сапарға шығарып салды

469 рет
көрсетілді
4 мин
оқу үшін

Өмірінің соңына дейін антына адал болып, бетпе-бет келген ажалдан қаймықпаған ер жүрек ұлмен қоштасу рәсімі марқұмның туған жері Әулиекөл ауданына қарасты Лаврентьев ауылында өтті. Қаралы жиында Ішкі істер министрінің орынбасары Алексей Калайчиди марқұмның ата-анасы мен туыс­тарына көңіл айтып, қайғыларына ортақтасты.

Ақтық сапарға шығарып салды

– Өкінішке қарай, тәуелсіздік жылдары қызметтік борышын атқару барысында 791 полиция қызметкері мерт болды. Дар­ханның мезгілсіз қазасы сіздерге ғана емес, ел тыныштығын ойлаған бар­­ша халыққа ортақ қайғы. Ішкі істер министрлігі алдағы уақытта марқұмның отбасына қолдау көрсететін болады. Бей­біт өмір күзетінде нағыз ерліктің үлгісін көрсеткен  Дархан Базарбаевтың есімі Қазақстан полициясының тарихында мәңгі қалады, – деді министр орынбасары.

ІІО Ардагерлер кеңесінің төрағасы Өмірзақ Болсамбековтің: «Құрметті Серік бауырым, Ләз­зат, Мөлдір! Құр­метті жерлес­тер! Кеше ғана ортамызда жү­ріп, қылмысқа қарсы күресіп, қо­­ғам­дық тәртіпті нығайтуға үлес қо­сып жүрген, антына берік ұлымыз қыл­­мыскердің қолынан қаза тауып, өмірден озды. Серік, айналайын! Өсір­дің, бақтың, қақтың. Біздің қата­рымызға қызметке келді. Бұл орны толмас қайғы! Біз – министрден бастап, бүкіл ішкі істер органдарының құрамы сіздердің қай­ғыларыңа ортақпыз. Дархан баламыз­дың батырлығы  мен жарқын бейнесі мәңгілік  есте қалады!» – деп егіле сөйлеген сөзі қабырғасы қайысқан қаралы көпшілікті тебірентіп өтті.

Қаралы митингте сөз алған Қостанай облысы әкімінің орынбасары Сергей Кар­плюк  Дарханның есімін жерлестері ешқашан ұмытпайтынын айтты.

 Облыстық Полиция департаментінің басшысы Бекет Айтмағамбетов:

– Дархан өте жас кетті. Соңында талай арманы орындалмай қалды. Ата-анасы, аяулы жары, кішкентай ұлы қалды.  Орны толмас қаза барлығымыздың қабыр­ғамызды қайыстырып кетті. Дарханның отбасы енді біздің қамқорлығымызда болады, – деді.

Жиын аяқталған соң қаралы көш батыр ұлдың мәйітін кіндік қаны тамған туған жері – Лаврентьев ауылындағы қорымға қойды.

Дархан Серікұлы Базарбаев 1995 жылы 24 сәуірде Қостанай облысы Әу­лие­көл ауданы Лаврентьев елді меке­нінде дүниеге келген. Мектепті тәмам­дағаннан кейін, 2011 жылы Қостанай экономикалық колледжіне оқуға түсіп, оны 2014 жылы аяқтайды. 2016 жылы Қазақстан Республикасының Қарулы Күштері қатарында қызмет етеді. Отан алдындағы әскери борышын  абыроймен атқарып, 2017 жылы туған жеріне оралған ол бірден ішкі істер органдарына қызметке алынады. Дархан қаңтардың 19-ына қараған түні қызметтік борышын атқарып жүріп, қаскөйдің қолынан мерт болды.

28 жастағы Тобыл қаласының тұр­ғыны өз үйінде жанжал шығарып, отбасы мүшелерін пышақтап тастамақ­шы болады.  Туыстары оны сыртынан құлыптап, полиция шақырған. Құрамында Дархан Базарбаев пен Амангелді Сыздықов бар патруль жасағы оқиға орнына 6 минут ішінде жетеді. Қаскүнемді ұстап жатқанда  Дархан жүрек тұсынан пышақ жарақатын алады. Бірақ қылмыскердің суық қаруын тартып алып, қолына кі­сен салып, отбасын ажалдан құтқарып үлгереді. Қылмыскерді етбетінен түсір­ген самдағай полицей серігі Амангелді Сыздықовқа қарап: «Осы маған пышақ ұрып алған сияқты»,  деген екен. Бір отбасын ажалдан құтқарып қалған қаһар­ман сержант сол жерде көз жұмды. Де­реу жеткен жедел жәрдем қызметі оның өміріне араша тұра алмады. Батыр­дың соңында ата-анасы, жары, 4 айлық ұлы қалды.

Дархан Базарбаев қызметтік борышын атқару үстінде көрсеткен ерлігі мен жанқиярлығы үшін Мемлекет басшысы Қасым-Жомарт Тоқаевтың Жарлығымен ІІІ дәрежелі «Айбын» орденімен наградталды.

Қостанай облыстық Полиция депар­та­ментінде өткен қаралы жиында Ішкі істер министрінің орынбасары Алексей Калайчиди орденді  марқұмның ата-анасына табыс етті. Ал аймақ басшысы Архимед Мұхамбетов Дарханның отбасына Қостанай қаласынан бір бөлмелі пәтер берді.

 

Нұрқанат ҚҰЛАБАЕВ

 

ҚОСТАНАЙ