Қоғам • 28 Қаңтар, 2020

Сары нөмір берілетін болды

382 реткөрсетілді

Кеше Орталық коммуникациялар қызметі алаңында Еуразиялық экономикалық одақ елдерінен Қазақстанға әкелінген автокөліктерді уақытша тіркеу және есепке қою мәселесіне арналған баспасөз конференциясы өтті.

Жиынға Ішкі істер министрінің бірінші орынбасары Марат Қожаев, Сау­да және интеграция вице-министрі Жанель Кушукова, Қаржы министрлігі мем­лекеттік кірістер комитетінің тө­ра­ғасы Марат Сұлтанғазиев қа­тыс­ты. Аталған ведомство өкілдері дау­лы мә­се­леге байланысты бірлесіп атқа­рып жат­қан жұмыстардың жай-жап­са­рын баяндады.

Ішкі істер вице-министрі Марат Қо­­жаевтың айтуынша, ЕАЭО ел­де­рі­­нен әкелініп, Қазақстанда уақытша тір­­­келген көліктерге «18» деген циф­ры бар арнайы сары нөмірлер бе­рі­ле­­ді.

– Уақытша тіркеу үшін көлік ие­лері жеке куәлігін, көліктің бұ­рын­ғы мемлекеттік немесе транзиттік нөмірін, тіркеу туралы куәлігін, мен­шік құқын растайтын құжаттарын, со­нымен қатар бастапқы тіркеу баж тө­ле­мінің түбіртегін, мемлекеттік нөмір мен техникалық паспорт дайындағаны үшін баж төлемінің түбіртегін әкелуі керек. Көлік иелеріне қойылып от­ыр­ған шарт өте қарапайым, бір жыл ішінде аталған автокөлікті заң­дастыруға, утилизация алымын және кедендік баж салығын төлеуге мүмкіндік берілді, – деді ол.

Өткен аптада Үкіметтің кеңей­тіл­ген отырысында Мем­лекет басшы­сы Үкіметке ел заңнамасын бұза отырып шетелден автокөліктердің әкелінуіне, пайдаланылуына шектеу қоюды тапсырғаны белгілі. Президент бұл  туралы: «Елімізге әкелінген мұндай авто­мо­­биль­дердің көпшілігі тіркеуге қо­йыл­май­ды. Ондай көліктер саны – ондаған мың. Бас прокуратураға қа­лыптасқан жағдайға байланыс­ты құқықтық баға беруді тапсырамын. Аталған мәселені шешу үшін Үкімет Қазақстанға Еуразия­лық эко­но­микалық одаққа мүше елдерден 2020 жылдың 1 ақпанына дейін әке­лін­­ген автомобильдерді бір айдың ішінде бір реттік тәртіппен уақытша тір­кеуді қамтамасыз етуі қажет. Бұл авто­­көліктерді тіркеу 2021 жылдың
1 нау­­рызына дейін жалғасады», деген бо­латын.

 Ішкі істер вице-министрінің ай­туын­­ша, сары түсті, «18» цифры жа­зыл­ған нөмірлер Президент айтқан мерзімге, яғни келесі жылдың 1 нау­рызына дейін жарамды. Егер азаматтар соған дейін жоғарыда айтылған тіркеу шараларын жасамаса, нөмірлер одан кейін жарамсыз деп танылып, полиция ондай көліктердің ел аумағында жүруіне шектеу қояды.

Сары түс пен 18-аймақ дегенді білдіретін арнайы цифр Ішкі істер министрлігіне аталған автокөліктерді басқа көліктерің арасынан оңай ажыратып, санын, қозғалысын бақылап отыруды жеңілдету үшін жасалған. Бір жыл ішінде көлігін тіркеуге қоймаған жағдайда иесі арнайы нөмірді қай­та­рып, көлігін ел аумағынан басқа жаққа әке­те алады.

Ішкі істер вице-министрінің ай­туын­ша, бүгінгі таңда елімізде тір­кел­ген авто­көліктердің жалпы саны 4 млн 200 мың­нан асады.

– Осы 4 млн 200 мыңнан астам авто­көліктің иелері Қазақстанның заңнамасында қарастырылған салық­тарды, баж салығын төлейді. Осы алым-салықтан құралған қаржы халықтың әлеу­меттік қажеттіліктеріне, жол, көпір сынды инфрақұрылым салуға жұм­са­ла­тынын жақсы білесіздер. 4 млн 200 мың адам әлеуметтік міндеттемелерін орындап келеді. Ал қалған бірнеше ондаған мың автокөліктің иесі бол­са Қазақстан аумағындағы жолдармен жүреді, қоршаған ортаға зиянды қалдықтарды шығарады, бірақ әлеуметтік мін­дет­темелерді орын­да­ғы­сы келмейді. Бұл әділ ме? Біз көп­ші­­ліктің мүддесін қорғауымыз керек, – деді Марат Қожаев.

Жалпы, Армениядан елімізге әке­лін­ген көліктердің саны 22 мыңға жуықтайды. Қырғызстан мен Ресей­дің әрқайсысынан 15 мыңға тарта авто­көлік келген. Қазіргі таңда Қаржы министрлігінің Мемлекеттік кі­ріс­тер комитеті мен Ішкі істер ми­нис­­трлігі бірлесіп, көлігін тіркеуге ниет­ті азаматтарға ыңғайлы жағдай жа­сау үшін «Жолда қабылдау» рес­пуб­ликалық акциясын жүзеге асыру­да. Акция аясында елдің барлық айма­ғында полицияның 516 кеңес беру пункті ашылып, шетелдік көлік құралдарын тіркеуге қатысты кеңес беріліп жатыр.

Соңғы жаңалықтар

Оралда Қадыр кеші өтті

Аймақтар • Бүгін, 11:07

Әріптестік орнатуға келісті

Технология • Бүгін, 08:16

Инвесторлардың алғысы

Аймақтар • Бүгін, 08:10

Ұқсас жаңалықтар