«Нұр Отан» партиясының Шығыс Қазақстан облыстық филиалының партиялық бақылау комиссиясы 24-25 қаңтар күндері Абай ауданы мен Семей қаласында болып, тұрғындардың мәселелерін тыңдап қайтты.
Комиссия төрағасы Мұхтар Әділбекұлы 24 қаңтарда Абай ауданының орталығы – Қарауыл ауылында партияның аудандық филиалы ғимаратында тұрғындарды қабылдады. Саржал ауылының тұрғыны Ыбырай Серікбай интернет мәселесін айтты. «2100 тұрғыны бар Саржалда интернет өте баяу. Тоқтамыс ауылында да осы жағдай. Абай атамыздың тойы қарсаңында осы ауылдарға интернет қосылса жақсы болар еді» деді ақсақал. Абай ауданының әкімі Жарқынбек Байсабыров бұл сұраққа бірден жауап беріп, интернет 2020 жылдың үшінші тоқсанында қосылатындығын жеткізді. Қабылдауға келген Әлмира есімді көпбалалы ана Семейдегі Шәкәрім университетінде 20 жастағы баласы ақылы оқып жатқандығын айтып, грантқа ауыстыруға көмек сұрады. Қарауылда тұратын тағы бір көпбалалы ана екі жылдан бері пәтер жалдап жүргендігін тілге тиек етті. Әділет Ешмұратов «Қарауыл-Аягөз» тас жолының жағдайын жеткізіп: «150 шақырымды 4-5 сағат уақыт жүреміз. Осы жол қашан жөнделеді?» деп сұрады.
Бұдан соң партиялық бақылау комиссиясының төрағасы «Нұр Отан» партиясы Абай аудандық филиалы төрағасы, аудан әкімі Ж.Байсабыровтың өңірде атқарылып жатқан жұмыстар, Абай Құнанбайұлының 175 жылдығына дайындық барысы жөніндегі есебін тыңдады.
Сонымен қатар осы күні Қарауылда салынып жатқан 300 орындық мектеп құрылысымен, құбыр жаңарту жұмыстарымен танысты.
«Абай жылы жақында ғана ресми түрде ашылды. Елбасымыз, Мемлекет басшысы Қасым-Жомарт Тоқаев та мерейтой тағылымды шаралармен есте қалуы керектігін айтты. Тиісті тапсырмалар берілді. Тойдың жоғары деңгейде өтуіне баршамыз атсалысуымыз керек» деді М.Төлеген.
Комиссия төрағасы 25 қаңтарда «Нұр Отан» партиясының Семей қалалық филиалының ғимаратында азаматтарды жеке мәселелері бойынша қабылдады.
Шығыс Қазақстан облысы
