Қазіргі кезде Жамбыл облысының Шу ауданына келген қытай азаматтары сол жерде коронавирусқа тексерілу үстінде. Абырой болғанда оларды коронавирусқа шалдықты деген хабар нақтыланған жоқ. Ал бұл ретте көпшіліктің дүрлігуі де негізсіз.
Атап айтсақ, Шу қаласының теміржол бекетінен 29 қаңтар күні таңғы сағат 05:45 шамасында 103 нөміріне вирусты инфекция жұқтырған болуы мүмкін деген адамдардың бар екеніндігі туралы хабар түскен. Артынша Жамбыл облыстық Денсаулық сақтау басқармасының қызметкерлері №86 «Сарыағаш – Нұр-Сұлтан» бағытындағы пойыздан қытайлық екі азаматты түсіріп алып, Шу аудандық орталық ауруханаға жеткізген. Ал Жамбыл облысы әкімдігінің мәліметінше, олар аудандық аурухананың жұқпалы аурулар бөлімшесінде медициналық бақылауға алынып, оларға жедел респираторлық вирустық инфекциялары бар деген диагноз қойылған. Қытайлықтардың жағдайлары бүгінде бірқалыпты.
Олардың дене қызуының көтерілуі де байқалмаған. Енді «Сарыағаш – Нұр-Сұлтан» бағытындағы пойыздың сол вагонында болған бұл жолаушылар 14 күн бойы дәрігерлердің бақылауында болады. Бүгінде облыстың медициналық орталықтары мен Шу ауданының медициналық ұйымдары жеке қорғану құрылғыларымен, дәрілік препараттармен, бір рет қолданылатын бетперделермен және залалсыздандыру құралдарымен толық қамтамасыз етілген.
