Ерлер арасындағы бәсекеде топ жарған сербиялық Новак Джокович бірінші орынға көтерілді. Жартылай финалға дейін жеткен испаниялық Рафаэль Надаль екінші орынға түсіп қалса, үздік үштікті швейцариялық Роджер Федерер түйіндеді. Қазақстандық теннисшілер арасында Александр Бублик екі саты жоғарылап, 54-орынға жайғасты. Михаил Кукушкин 68-орнын сақтап қалса, Дмитрий Попко 170-орынға тұрақтады.
Қыздар арасында аустралиялық Эшли Бартидің бағы жанып тұр. Жасыл құрлық өкілін аталған жарыстың жартылай финалында өнер көрсеткен румыниялық Симона Халеп өкшелеп келеді. Ал өткен рейтингте екінші орында тұрған чехиялық Каролина Плишкова үшінші орынға түсіп қалды. Australian Open бәсекесінің үшінші айналымына дейін жеткен қазақстандық теннисшілер нәтижесін біршама жақсартып алды. Жаңа рейтингте Елена Рыбакина 25-орынға жайғасып, отандасымыз Ярослава Шведованың рекордын қайталады. Шведова 2012 жылы әлемдік рейтингте 25-орынға дейін жоғарылаған болатын. Ал Юлия Путинцева 4 саты көтеріліп, 34-орынға тұрақтаса, Зарина Диас 63-сатыға жайғасқан. Аустралия біріншілігінің қыздар бәсекесінде София Кенин жеңімпаз атанғанын айта кетейік.
