Комиссия мүшелеріне жас мамандар теориялық білімдері мен алғашқы медициналық көмек берудің тәжірибелік дағдыларын көрсетті. Әрбір қатысушы сұрақтарға жауап беріп, тәжірибелік ептіліктерін байқатты. Сөйтіп, іріктеу конкурсының нәтижесі бойынша комиссия мүшелері 279 маманды жұмысқа орналастыру туралы шешім қабылдады.
Қоғамдық денсаулық сақтау басқармасының мәліметінше, үміткерлердің қатарында көпбалалы отбасыдан шыққан 86 және ата-аналары мүмкіндігі шектеулі 17 жас болған. Жұмысқа тұрған жастардың арасында мүмкіндігі шектеулі жандар да бар.
Бүгінде өңірде әлеуметтік жағынан аз қамтылған отбасы мүшелерін тұрақты жұмысқа тарту мәселесіне көп көңіл бөлінуде. Сондай-ақ облыста Мемлекет басшысының тапсырмасына сәйкес 5300 дәрігердің еңбек жалақысы 30 пайызға, 18 мыңнан аса орта буынды маманның айлығы 20 пайызға көтерілген.
Бұдан бөлек, медициналық емес зертхана мамандарының айлық жалақылары 30 пайызға өсті.
