«Қазір қазақ күресінің 100 сағаттық оқу бағдарламасы дайындалды. Ол оқу бағдарламасында қазақ күресінің әліпбиінен бастап, өзіндік спорт түрі ретінде барлық қырлары, оқыту жолдары қамтылған. Алдағы оқу жылдары қанатқақты жоба ретінде Нұр-Сұлтан қаласының 5 мектебінде дене шынықтыру пәндеріне қазақ күресі енгізіледі. Барлық мектепке қазақ күресі сабағын енгізу үшін мамандар тапшылығы байқалуы мүмкін», дейді Дәурен Абаев.
Оның айтуынша, осы ретте мамандар дайындайтын қазақ күресі академиясын ашуды жоспарлап отырғанын айтты.
«Сондықтан біз мамандар даярлайтын Қазақ күресі академиясын ашуды жоспарлап отырмыз. Академия мамандарды ғана оқытып қоймай, төрешілердің біліктілігін арттыру, ұлттық күрестің ғылыми-практикалық тұрғыда зерттелуін қамтамасыз етеді. Барлық әлемдік спорт түрлері сияқты қазақ күресін ғылыми тұрғыдан зерделеуіміз керек. Солай ғана төл күресімізді әлемдік деңгейге көтере аламыз. Қазір халықаралық аренада қазақ күресінің атауын өзгерту туралы жиі айтылып жүр. Осы орайда біз зерттеуші ғалымдар тобына қазақ күресіне қатысты терминдерді жүйелеуді тапсырып отырмыз», деді федерация президенті.
Қазақ күресі федерациясының бас хатшысы Бақдәулет Сәбитовтың айтуынша, биылғы «Қазақ күресінен 2020 жылға арналған спорттық-бұқаралық іс-шаралардың бірыңғай республикалық күнтізбесінде» балалар, жасөспірімдер, жастар және ересектер арасында 104 спорттық шара ұйымдастыру жоспарланған. Оның ішінде, «Бала балуан» турнирі, Қазақстан оқушылар гимназиядасы, Қазақстан колледж студенттері арасындағы спартакиада, қазақ күресінің бір тармағы саналатын белдесуден «Қазақ Арланы», «Дала Арланы» сияқты спорттық шаралары тұңғыш рет өткелі тұр.
Ал ересектер арасындағы Қазақстан Республикасының чемпионаты мен «Қазақстан барысы», «Халық барысы», «Еуразия барысы» жобалары және республикалық ірі турнирлер жыл сайынғы дәстүр бойынша тұрақты түрде ұйымдастырыла бермек.
