Call center-ге келіп түскен қоңыраулардың дені МӘМС үшін аударымдар мен жарна төлеу, сақтандыру мәртебесін анықтау, қымбат тұратын медициналық қызметтерді алу мәселелеріне қатысты болды. Сондай-ақ жеке жағдайларға байланысты өтініштер де келіп түсті. Мұндай жағдайларда оператор пациенттің деректерін алып, өтінім бойынша ақпаратты тиісті мамандарға береді.
Қордың халықпен кері байланыстың болуына ерекше көңіл бөлетінін, оны жүзеге асыруда 1406 байланыс орталығының рөлі маңызды екенін айтқан Айбатыр Жұмағұлов: «Бүгінгі іс-шараның мақсаты – пациенттердің құқықтарын қалай қорғауға болатынын көру. Тұрғындар медициналық ұйымдарға қаралған кезде қандай қиындықтарға тап болатынын анықтау маңызды. Байланыс орталығына келіп түскен әрбір өтінім мұқият тексеріліп, талдау жасалады. Адамдардың сақтандыру тақырыбына белсенділік танытқанына қуаныштымыз. Төлем жүйесі мен қызмет көрсету туралы, атап айтқанда клиникалық диагностикалық көмек туралы сұрақтар жиі қойылады. Көптеген азаматтар бірден зертханаға немесе диагностикалық орталыққа барып, тегін қызмет алғысы келеді. Дәрігердің жолдамасы болмағандықтан олар осы қызмет түрлерін ала алмағандарына шағымданады. Алайда, ең алдымен, азаматтар дәрігеріне хабарласуы керек. Мысалы, томография белгілі бір дәрежеде сәулеленуге әкеліп соғады және оны жайдан-жай жасай беруге болмайды. Сондықтан дәрігер пациентке МРТ-ны нұсқаулықтар болған жағдайда ғана тағайындайды. Сондықтан алдымен дәрігерге барып, оның белгілері туралы айту керек», деді.
Өткен жылдың қыркүйек айынан жұмысын бастаған байланыс орталығы 2020 жылдан бастап 24/7/365 жұмыс істеу режіміне көшірілді. Жаңа жылдан бері 24 мыңнан астам өтінім түсіп, оның 23 мыңнан астамына (96,6%) жауап берілген, ал қалғандары өңделуде. Бір тәулікте операторлар 1 мыңға жуық қоңырауды қабылдап, өңдейді. Орталық тиімді жұмыс істеу мақсатында түскен өтінімді өңдеудің жаңа, үш деңгейлі моделіне көшкен. Атап айтқанда, ең алдымен, консультациялық деңгейде өтініштердің шамамен 85%-ы жабылады. Екінші деңгейде азаматтардан келіп түскен өтінімдердің себептері мен оның қайталануын сараптау және медициналық ұйымдардың жауаптарының сапасы мен жүйелілігі тексеріледі. Ең соңында қор филиалдары мен медициналық ұйымдар деңгейінде себептерді жоя отырып, шағымдар тексеріледі.