«Рухани жаңғыру» бағдарламасы аясында, сондай-ақ Ұлы Абайдың 175 жылдық мерейтойы қарсаңында өткен шара еліміздің рухани құндылығы – қыз ұлағатын дәріптеу мақсатында көпшіліктің көңілінен шықты. Байқауға қатысқан арулар ұлы Абайдың көңіл түкпірінде мәңгі мұнартып қалған Тоғжан бейнесін айнытпай жеткізуде өз өнерлерін әр қырынан таныта білді.
Сайыстың алғашқы кезеңінде әр қатысушы өзін өлеңмен таныстырып өтсе, келесі кезеңде Абайдың ойлы өлеңдері мен қара сөздерінен үзінді оқудан бақ сынасты. «Өнерге әркімнің-ақ бар таласы» демекші көрермендер қатысушылардың шырқай ән айтып, мың бұрала би билеген таңғажайып өнерлеріне ерекше тәнті болды.
Қызықты әрі тартысты өткен сайысты саралаған қазылар алқасы байқау қорытындысы бойынша Қаратал орта мектебінің оқушысы Аяжан Манарбекқызын бас жүлдеге лайық деп таныды.
Ұлттық болмысымыз бен рухани құндылықтарымыз дәріптелген байқаудың жоғары деңгейде өтуінде аудандық мәдениет үйінің режиссері Алма Сүлейменова мен Қаратал орта мектебінің мұғалімі Гүлден Сайранованың еңбектерінің ерекше екендігін атап өткен жөн. Сонымен қатар хакім өлеңдерін жатқа оқыған жүргізушілер Зайсан технологиялық колледжінің студенттері, «Жастар» поэзия театрының мүшелері Әлішер Слямбеков пен Айқын Қуандық және «Жастар» поэзия театрының өзге де жас өнерпаздары өнерлерімен көрермендерін тәнті етті.
Әсерлі кештің куәсі болып, ақылына көркі сай, инабатты да ибалы қыздарымыздың өнеріне сүйсіндік. Ұлы Абай жырлап өткен, есімі махаббат пен сұлулықтың символына айналған Тоғжандай қыздарымыз көп болғай дегіміз келеді.
Нұргүл ХАЛЫҚОВА,
журналист
Шығыс Қазақстан облысы,
Зайсан ауданы
