«Жетім көрсең, жебей жүр...»
«Birgemiz Sabaqtastyq» жалпыхалықтық жобасы – тәлімгерлік жөніндегі бағдарлама. Бұл жоба осыдан 5 жыл бұрын тәлімгерлікті қолға алған «Дара» қайырымдылық қорының жұмысымен үйлеседі. Біз жетімдер үйінде ата-анасының қамқорлығынсыз қалған балаларға, жасөспірімдерге, қиын өмір жағдайын бастан кешіп жатқан балдырғандарға қол ұшын созамыз.
Жетімдер үйіне сыйлықпен барған адам жақсылық жасадым деп ойласа, ол мүлде қателеседі. Біз бар болғаны аяушылық танытып, «сыйлық жасадым» деген оймен өз-өзімізді жақсы сезінеміз. Балалар сыйлыққа мұқтаж емес. Өз ауыздарынан естідім. Жетімдер үйінің бір тәрбиеленушісі БАҚ өкілдеріне берген сұхбатында: «Жаңа жыл мерекесінде тәтті кәмпит үлестірген кезде әр балдырғанға кемі 70 келіден бұйырады. Бізге сол кәмпит керек деп ойлайсыз ба? Жоқ. Бізге көңіл күйімізді сұрайтын, жан-дүниемізде не болып жатқанын тыңдағысы келетін адам керек», деген еді. Олар дүние-мүлікке, қызылды-жасылды заттарға емес, мейірімге зәру.
Асырап алушылар көбіне-көп 10 жасқа толмаған балаларды қанатының астына алғысы келеді. Одан ересектеріне ие бола алмаймыз деп топшылауы мүмкін. Міне біз сол 10 жастан асқан балаларға қамқорлық танытамыз. Оларды ортаға бейімдеуге тырысамыз. Тәлімгер өз жетістігін үлгі ете отырып, тәрбиеленушіге мамандық таңдауға, қызметке орналасуға қатысты дұрыс жол нұсқауға тырысады.
Біз Алматы, Нұр-Сұлтан, Павлодар, Қарағанды, Ақтау, Орал, Семей, Шымкент, Теміртау сынды 9 қалада жұмыс жүргізіп жатырмыз. Барлығы 134 тәлімгеріміз бар. Ашығын айтайын, кез келген адам тәлімгер бола алмайды. Оған тәлімгер болуға үміткер азаматтың арнайы психологиялық портреті сәйкес келуі, психологиялық оқудан өтуі керек. Балалармен құр ойнауға, сыйлық жасауға ұмтылған адамдар тәлімгер бола алмайды. Өмірде көрген-түйгені мол, айрықша көзқарастағы адамдарды тәлімгер ретінде қабылдаймыз. Әр волонтер-тәлімгер 1 баламен кемі 2 жыл жұмыс істеуі туралы шартқа қол қояды. 1 жылдан кейін тәлімгерге бала да бауыр басып үлгереді. Кейін бұл бауырмалдық өмір бойына ұласуы мүмкін.
Сонымен қатар бізде корпоративті тәлімгерлік деген бағыт та бар. Қазақстандық және халықаралық ұйымдардың қызметкерлері арқылы іс-әрекетке, кәсіпке, жұмысқа дағдылаймыз. Мәселен, жетімдер үйіндегі тәрбиеленушілер өмір дағдысына, ортаға бейімделуі қажет. Қарапайым мысал – жұмысқа қандай киім киіп бару керектігіне дейін ұғындырамыз. Бізге соның барлығын ата-анамыз үйретті. Үйретпесе, бақылай жүріп түсіндік. Ал жетімдер үйіндегі балалардың ата-аналары мүлде жоқ немесе нашақорлыққа, ішімдікке салынып кеткен. Түрмеде отырғандары да бар. Сондықтан ондай балаларды өмірге бейімдеу – ауадай қажет дүние.
Алдағы жоспарымыз – бүгінгі жеткен жетістігімізді лайықты жалғастыру. Сондай-ақ Атырау, Шымкент қалаларында тәлімгерлерді дайындауды, беделді, атақты азаматтар арасынан тәлімгерлер іздеуді көздеп отырмыз.
Айнұр АЙМУРЗИНА,
«Birgemiz Sabaqtastyq» жалпыхалықтық жобасының амбассадоры, «Дара» жобалар мен бағдарламалар қайырымдылық қорының директоры
Волонтерлердің беделі артады
Волонтерлердің республикалық фронт-офисінің ашылуына арналған жиынға қатысқан волонтерлер бірнеше бағыт бойынша нақты мәселеге көз жеткізіп, өз істерін алаңсыз жалғастыруға және жұмыстарын ынталандыруға қатысты маңызды сұрақтардың жауабын тапты деп ойламын.
Өзім екі нәрсені анық байқадым. Біріншіден, Мемлекет басшысы Қасым-Жомарт Тоқаев волонтерлердің атқарған жұмысының заңды негізі жасалатынын айтты. Ендігі жерде жастардың волонтерлікке арнаған жылдары еңбек өтілі ретінде есепке алынатын болды. Бұл – біз үшін көптен күткен жағымды жаңалық болды. Енді волонтерлердің қатарына сұранушылардың легі көбейеді деп ойлаймын енді. Сондай-ақ олардың еңбегіне қарай көтермелеу ақысымен, стипендиямен ынталандыру шешілмек. Бұл да волонтерліктің беделін көтеріп, олардың қызметіне деген құрметті арттырмақ. Екіншіден, еліміздің барлық аймағынан келген замандастарымызбен танысып, пікір алмасудың оңтайлы сәті болды. Ұсыныстарымызды ортаға салдық, тәжірибемізбен бөлістік. Достастық, ақылдастық. Бұл болашақта еріктілердің тұтас ел бойынша жұмыла еңбек етуіне оң әсер етеді. Волонтерлердің республикалық штабы аясында фронт-офис ашылды. Осындай орталықтар облыстарда да жұмыс істейтін болады.
Жетісулық волонтерлер үшін жастарға жүктелген міндеттер қалыпты шаруа десем, қателеспеспін, өңір жастары білек сыбанып жұмыс істеуді дәстүрге айналдырған. Біз табиғатты аялауға, ардагерлер мен қарттарға көмек көрсетуде үнемі бастамашы болып жүрміз, тәртіп сақшыларына көмекші болып, қоғамдық бақылауға да үлес қосып отырмыз. Биыл ауыл жастарының білімін арттыруға, оның ішінде ағылшын тілін оқытуға өз күшімізді жұмсауға кірісеміз. Бұған облыстағы 17 аудан мен 3 қалада барлық жағдай жасалған.
Ержан ДӘУЛЕТБАЕВ,
волонтер
Алматы облысы
Талапты жастарға берілген мүмкіндік
Волонтер фронт-офисінің ашылғанына ерекше қуанып отырмын. Бұл шараға өзім де қатыстым. Биылғы жыл еліміздегі волонтерлер үшін үлкен мүмкіндік деп есептеймін. Қазір республика бойынша көптеген тың жобалар қолға алынып жатыр. 2017 жылы біздің университетте волонтерлік корпус ашылған. Біздің волонтерлік корпус бірнеше бағытта жұмыс істейді. Тұрғындарға әлеуметтік көмек көрсетеміз. Бұдан бөлек волонтер ретінде республикалық сайыстарға да қатысамыз. Мамандығымыз дәрігер болғаннан кейін қаладағы медициналық мекемелерде ауыр науқастарды емдейтін дәрігерлерге жәрдемдесеміз. Олардың жұмысын жеңілдетуге атсалысамыз. Биыл Ресейдің волонтерлерімен бірлесе жұмыс істемек ойымыз бар. Медициналық мекемелерге көмектесуді жалғастырамыз. Балалар үйі мен Қарттар үйіне де дәстүрлі түрде барып концерт қоямыз. Өзім кеше Нұр-Сұлтандағы фронт-кеңсесінің ашылуына орай ұйымдастырылған секцияда сөз сөйлеп, волонтерлердің ауыр науқастарға көмектесуі жөнінде ойымды ортаға салдым. Осы жиында жақсы идеялар айтылды. Денсаулық сақтау вице-министрі медицина бағытындағы волонтерлерге қолдау білдіретінін жеткізді. Бір сөзбен айтқанда, 2020 жыл талапты жастардың қоғамдық істерге белсене араласуына зор мүмкіндік беретіні анық.
Гүлфайруз ТУКИНОВА,
Семей медицина университетінің 5-курс студенті, университет жанындағы «QazMedVolunteers» корпусының төрайымы
