Сонымен қатар өткізу мақсатынсыз есірткіні заңсыз сақтаумен байланысты 50 қылмыстық іс анықталды.
Заңсыз айналымнан 5 кг жуық түрлі есірткі заттары, оның ішінде марихуана, героин және синтетикалық «мефедрон» есірткісі тәркіленді.
Профилактикалық жұмыс шеңберінде 15 іс-шара өткізілді, соның ішінде семинарлар, дәрістер, кездесулер және ата-аналар жиналыстары, есірткіге қарсы сипаттағы бейнероликтер көрсетілді.
Маңғыстау облыстық ПД Жергілікті полиция қызметі басқармасымен бірлесе отырып, Ақтау қаласының қоғамдық орындарында 8 граффити жазулар, сондай-ақ есірткі құралдарын және олардың аналогтарын жарнамалаумен және сатумен айналысатын 24 интернет сайт анықталып, жойылды.
Биыл қаңтар айында облыстық ПД ЕҚҚІҚ қызметкерлері жеде-іздестіру іс-шараларын жүргізу барысында Мұнайлы ауданының аумағында Атамекен ауылында 1974 жылы туған «Б» есімді азамат құрықталды. Оның тұратын мекен-жайы бойынша үй мен учаскені тінту кезінде 2 килограммнан астам «марихуана» есірткі заты бар алты пакет табылып, тәркіленді.
Аталған факті бойынша ҚК-нің «аса ірі көлемде есірткі құралдарын заңсыз сатып алу және сақтау» бабы бойынша сотқа дейінгі тергеу басталды.
