Экономика • 21 Ақпан, 2020

Мұнай мен конденсат өндіру деңгейі тұрақты

451 рет
көрсетілді
5 мин
оқу үшін

«ҚазМұнайГаз» ұлттық компаниясы» АҚ 2019 жылдың өндірістік нәтижелерін жариялады.

Мұнай мен конденсат өндіру деңгейі тұрақты

Өткен жылы мұнай мен конденсат өндіру деңгейі тұрақты болып, 23 618 мың тоннаны немесе Қазақстан бойынша барлық өндіру көлемінің 26 пайызын құрады. Кәсіпорын алғаш рет PRMS халықаралық стандарттарына сәйкес әзірленген қор нәти­желерін жариялап отыр. ҚМГ-ның дәлелденген және ық­тимал көмірсутегі қоры 2019 жылдың 31 желтоқсанында мұнай экви­ва­лентінде 676 млн тоннаны (5 220 млн мэб) құрады. Мұнай мен газ тасымалдау сегменті тұрақты жағдайды көрсетуде. Айталық, компанияның құбыр желілері арқылы 78 066 мың тонна мұнай және 103 494 млрд текше метр газ тасымалданды.

ҚМГ Қазақстанның ішкі нарығының ашық түсті мұнай өнімдеріне сұранысын толық өтеді. Артылған көлемі Еуропа мен Орталық Азия нарықтарына экспортқа шығарылды. Компания ашықтықты қолдайтынын растай отырып, алғаш рет парниктік газ­дардың шығарындылары тура­лы есепті жариялады. Есеп кли­мат­тың өзгеруіне бейімделу жөнін­дегі ҚМГ-ның жетістіктері мен жос­парларын ашып көрсетеді.

«2019 жыл кәсіпорын үшін табысты болғанын хабарлай­мын. Біз қауіпсіздік мәселелерін қашанда басты назарда ұстап, мұнайды барлау мен өндіру, тасы­малдау және өңдеу бағыт­тарында қызметімізді жалғастыр­дық. Соның нәтижесінде Қа­зақ­станның ұлттық мұнай-газ саласындағы көшбасшы ком­пания екенімізді тағы да дәлел­дедік. Негізгі мүдделі тарап­тардың сенімі компания мәр­тебесін сақтап тұруда маңыз­ды екенін айрықша атап өте­міз. Бұл ретте мүдделі тарап­тар үшін кірісті барынша көбейту жөніндегі стратегиямызды жүзеге асыруда едәуір нәтижеге қол жеткіздік. ҚМГ үшін бизнесті жауапкершілікпен жүргізу және адамдар мен қоршаған ортаға қамқорлық таныту әрдайым басымдыққа ие екенін мәлімдейміз», деді «ҚазМұнайГаз» ҰК АҚ басқарма төрағасы Алик Айдарбаев.

Былтырғы жылдың өндірістік нәтижелеріне тоқталар болсақ, көмірсутек шикізатын өндіру бойынша ҚМГ-ның мұнай мен газ конденсатын өндіру көле­мі тәулігіне 485 мың баррель­ді құрап, өткен жылмен салыс­тырғанда өзгеріссіз қалды. Ілеспе және табиғи газды өндіру көлемі 3,9 пайызға өсіп, 8 455 млн текше метрді құрады. Теңіз, Қашаған, Қарашығанақ сияқты ірі жоба­лардың мұнай және ілеспе табиғи газды өндіру көлеміндегі ҚМГ үлесі тиісінше 8 142 мың тоннаны (тәулігіне 178 мың баррель) және 5 819 млн текше метрді құрады.

Теңіз мұнай өндіру кө­ле­­міндегі ҚМГ үлесі 4,1 пайыз­ға, 5 958 мың тоннаға дейін (тәу­­­лігіне 130 мың баррель) ұл­ғайды, ал газ өндіру 4,2 па­йыз­ға 3 258 млн текше метр­ге дейін өсті. Күрделі жөндеу жүр­­гізу үшін өндіру процесінің тоқ­татылғанына қарамастан, көлемнің ұлғаюы жұмыстың тұрақ­тылығына және КТЖ/ШГА/ЕБЗ зауыттары (кешенді-технологиялық желі/ шикі газды айдау/ екінші буын зауыты) беріктігінің артуына байланысты болды. Өткен жылы 1 тамыз бен 9 қыркүйек аралығында Теңізде КТЖ1 зауытында 40 күнге созылған жоспарлы күрделі жөндеу жұмыстары жүргізілді.

Қашаған кен орнында мұнай өндіру көлеміндегі ҚМГ үлесі 6,9 пайызға, 1 169 мың тоннаға дейін (тәулігіне 25 мың баррель) артты. Табиғи және ілеспе газды өндіру көлемі 10,4 пайызға өсіп, 700 млн текше метрді құрады. Мұнай және газ өндіру көлемі 2019 жылдың 14 сәуірі мен 19 мамыры аралығында жерүсті және теңіз кешендерінде күрделі жөндеу жүргізу және пайдалану коэффициентін 98,4 па­йызға дейін арттыру аясында жүргізілген жұмыстардың нә­ти­жесінде артты. 2019 жылы Қа­шағанда өндіру ең жоғары көр­­сет­кішке жетіп, тәулігіне 400 мың­­­­­ға жуық баррельді құрады. Ал 2019 жыл­дың IV тоқсанындағы орташа тәуліктік өндіру деңгейі тәулігіне 344 мың баррельді құрады. Қашаған кен орнында алғаш рет барлық өндірістік нысандар толық тоқтатылып, күрделі жөндеу жұмыстары сәтті аяқталды.

Операциялық активтердің мұнай мен газ өндіру көлеміндегі ҚМГ үлесі шамалы азайып, тиісін­ше, 15 476 мың тонна (тәу­лігіне 307 мың баррель) және 2 636 млн текше метрге де­йін төмендеді. Операциялық актив­тердегі өндіру көлемінің төмен­деуі негізінен Қазгермұнай және ПетроҚазақстан кен орындарында өндірістік жоспарға сай өндіру деңгейінің сәйкесінше 17,7 және 15,5 пайызға табиғи жолмен төмендеуіне байланысты болды.

2019 жылы ҚМГ жеке өзі өндірген мұнай мен газ конденсатын сату көлемі өткен жылмен салыстырғанда өзгерген жоқ және 23 509 мың тоннаны құрады. Оның 70%-ы экспортқа шығарылды. Ал ішкі нарыққа өзі өндірген мұнайды жеткізу көлемі 7 130 мың тоннаны (кейіннен мұ­най өнімдерін өткізу үшін 6 672 мың тонна көлемінде шикі мұнай жеткізуді қоса алғанда) құрады.

 

 

Соңғы жаңалықтар

Су үнемдейтін қондырғы

Технология • Кеше