Бүгінде еліміздің жасыл қалқанын ұлғайту мақсатында бірлескен жоба әзірленіп жатыр. Осы арқылы парник газдарының көлемін азайту көзделіп отыр. Сарапшылардың бағалауынша, Қазақстандағы орман көміртегінің жалпы көлемі 718,3 млн тоннадан астам көміртегі диоксиді эквивалентіне тең. Жасыл белдеудің 4,6%-дан 5%-ға дейін артуы көміртегінің ормандар арқылы сіңірілуін жылына қосымша 2,9 млн тоннаға дейін ұлғайтуға көмектеседі екен. Бұл ретте орман алқаптары су ресурстарын, биоалуандылықты, сондай-ақ экотуризм сынды бағыттарды реттеп, оң ықпал ететінін айта кеткен орынды.
Қазақстан 2016 жылы климаттың өзгеруі жөніндегі Париж келісімін ратификациялап, жеке сектордың қатысуымен инновациялық шешімдерді жұмылдыру арқылы 2030 жылға қарай парник газ шығарындысын 15%-ға қысқартуға жоспар қойды.
– Қазір Қазақстандағы ауаның негізгі ластаушылары көлік және энергетика салалары. Жыл сайын экожүйеге түсетін салмақ артып барады. Яғни, ормансыз, парник газының көлемі өсе түседі. Демек, Париж келісімінің мақсаттарына жету қиындады. Мұндай жағдайда мемлекеттен бөлек, жеке бастамалардың да маңызы зор. Сондықтан біз Bitfury Group компаниясының климатты қорғау саласындағы бастамасын қолдаймыз, – деді Экология, геология және табиғи ресурстар министрі Мағзұм Мырзағалиев.
БҰҰ Даму бағдарламасы жаңа экологиялық кодекстің жобасына бірнеше заңнамалық ұсыныс әзірледі. Оның ішінде ормандарды бағалаудың жаңа әдіснамасы, сондай-ақ БҰҰ-ның климаттық келісіміне сай Қазақстандағы зиянды шығарынды заттарды азайту жөніндегі жобалар қамтылған.
– Қазақстан Үкіметіне қоршаған ортаны қорғауға арналған заңнаманы жетілдіруге және табиғатты тиімді басқару үшін қаржылық мәселелерді шешуге көмектесуді жалғастырамыз. Әсіресе жекелей бастамаларды ынталандыруға мән берілмек, – деді БҰҰ Даму бағдарламасының Қазақстандағы тұрақты өкілі Якуп Бериш.
Кездесу соңында тараптар ынтымақтастық туралы үшжақты келісімге қол қойды. Серіктестер Қазақстанда орман алқаптарын ұлғайту және орман пайдалану тәжірибесін жетілдіру, сондай-ақ климаттың өзгеруі туралы жұртшылықтың хабардар болуын күшейту есебінен парниктік газдар шығарындыларын азайту бойынша жұмыс істейтін болады.
Қазақстандағы Bitfury Group Ғаламдық кеңсесі әкімшілігінің басшысы Вадим Крутов жаһандық экологияны қорғау үшін тұрақты даму мақсаттарын толық қолдайтынын, компания Қазақстандағы парник газының көлемін азайту бағытындағы бірлескен жұмыстарға толығымен әзір екенін жеткізді.
