Бас санитарлық дәрігердің айтуынша, бүгінде ҚХР-дағы жағдай тұрақталған, күнделікті өсу бәсеңдеген. Өткен күннің нәтижесі бойынша ауруды жұқтыру 0,28% төмендеген. Алайда, әлемнің басқа елдерінде коронавирустың таралуы қарқын алып жатыр.
Оңтүстік Корея республикасында соңғы екі күнде коронавирусты жұқтыру екі есеге өскен. Бұл жағдай Оңтүстік Кореяның екі провинциясында тіркелген. Кореяда 23 мың Қазақстан азаматы бар. Олардың арасында науқас жұқтырғандар тіркелмеген. Сонымен қатар Италия елінде – 144, Жапонияда – 132, Сингапурда – 89, Иранда – 43, Тайландта – 35, Малайзияда – 22, Вьетнамда 16 науқас тіркелген.
«Бұл мемлекеттер қазіргі таңда бізді ерекше алаңдатып отыр. Осы аталған мемлекеттерге шықпауларыңызға кеңес беремін. Егер алдын ала жоспарлап қойсаңыз билет құны өзгеріссіз қайтарылады. Шетелде науқас жұқтырғандар арасында Қазақстан азаматтары жоқ», деді Ж.Бекшин.
Елге келіп жатқан әрбір ұшақтың жолаушылары қатаң бақылауда. Сонымен қатар Жандарбек Бекшин барлық шекаралас өңірлерге өзі барып көргенін алға тартты. Спикердің айтуынша, бүгінде елге кіретін барлық жол қатынас түрлері қатаң бақылауда. Коронавирус елде тіркелген жоқ.
