ЖАҢА ӘРІПТЕСТІККЕ ЖОЛ АШЫЛДЫ

Кеше Астанадағы “Rіxos Presіdent Astana” қонақүйінде Қазақстан  Президенті Н.Назарбаев және Словакия Президенті И.Гашпаровичтің қатысуымен Қазақстан — Словакия арасындағы іскерлік форумы болып өтті. Форум аясында әскери зираттар туралы үкіметаралық, “Қазақстан темір жолы” ҰК” АҚ пен “ZOS-VYVOJ” компаниясы арасындағы бірлескен кәсіпорынның жарғылық шартына, сондай-ақ Іскерлік кеңес құру туралы келісімдерге қол қойылды. Бизнес-форумды алғысөзбен ашқан Елбасы мұндай шаралар­дың екіжақты қарым-қаты­нас­тар­ға үлкен көмегін тигізетіндігін атап көрсетті. Бүгінгі бизнес-фо­рум менің 2007 жылғы Брати­слава­ға ресми сапарымның заңды жалғасы секілді. Сол жолы салық және бас­қа да салалар бойынша екіжақты қол қойылған  құжаттар бүгінгі кез­десуімізге негіз болып отыр. Үстіміздегі жылы Қазақстан алда­ғы 10 жылға арналған индус­трия­­лық-инновациялық даму бағ­дар­­ла­ма­сын әзірлеп, оның шең­бе­рінде 144 жаңа жобаны аяқтап, оған қоса құны 26 млрд. долларды құ­рай­тын 47 жобаны жүзеге асы­ру­ды жоспарлап отыр. Мұның бар­лығы да қаржылық тұрғыдан және жобалаумен қамтамасыз етілген. Президент еліміздің нені, қашан және қалай жүзеге асыра­ты­­ны­мыз­ды, қашан аяқтауы­мыз­ды нақты білетіндігімізді баса айт­ты. Елі­міз­де ірі инфрақұры­лым­дық жобалар жүзеге асуда. Соның бірі “Батыс Қытай – Батыс Еуропа” автокөлік жолының са­лы­нуы болып табы­ла­ды. Ел аума­ғы бойынша 2 700 км. жолды кесіп өтетін құрылыс биыл­ғы жылдан бастап, салына бас­та­мақ. Бұл жобалар үлкен ерік-жігер, талпынысты, сонымен қатар, зор мүмкіндікті қажет ететіні анық, дей келе, Президент словак биз­нес­­мен­дерін осы жобаларға атсалы­суға шақырды. Еліміздің индустриялық-ин­но­вациялық бағдарламасына қаты­сып, өз мүмкіндіктерін сынап кө­ру­ге шақыру алған Словакия Пре­зиденті Иван Гашпарович риза­лы­ғын жеткізе отырып, өз тарабынан елімізді “Одесса-Броды” мұнай құ­бырының салынуына қатысуға шақырды. Қазақстан Словакия және Еуро­­одақ үшін Орталық Азиядағы ма­ңызды  мемлекет. Сонымен қа­тар, негізгі әріптес те. Осы орайда Еуро­­палық комиссия Қазақстан “Одесса-Броды” мұнай құбыры арқылы мұнай тасымалдауы мүм­кін бағыттағы жобаны қарас­ты­ру­да. Бұл жағдайда Словакия еліміз­ге үшінші елдерге мұнай тасымал­дау­ға өз мұнай құбырларын қол­дануға бермек деп атап көрсетті Словакия Президенті Иван Гашпарович. Бүгінде Қазақстан мен Сло­ва­кия арасындағы инвестициялар  33,5 млн. долларды құрап отыр. Сауда-экономикалық әріптестік өткен жылы 1 094,3 млн. дол­лар­ды көрсетті. Мәселен, словак капита­лы­ның қатысуымен елімізде 16 кәсіпорын жұмыс істеуде. Атап айтсақ, “Нафта Кбел” компа­ния­сы Каспийдің жеңіл мұнайын Бал­тық жағалауы елдеріне экспорт­тай­тын Атырау қаласындағы “Анако” компаниясының инвес­то­ры болып табылады. Ал соңғы кездері бұл ел Қазақстандағы құ­ры­лыс, фарма­цев­тика саласы мен көтерме сауда бағытына қызығу­шы­лық танытуда. Еліміз Слова­кия­ға мұнай, мұнай өнімдері, ме­талл, мақта, хими­кат­тар экспорт­тайды. Елге импорт­талатын негізгі өнімдер мәшине жасау саласының өнімдері, техни­калар және жаб­дықтар, құрылыс ма­териалдары, гербицидтер, дәрі­лер, азық-түлік өнімдері, поли­графиялық өнімдер, текстиль мен жиһаздар болып келеді. Форум барысында қол қойыл­ған құжаттардың бірі – “Қа­зақ­стан темір жолы” ҰК” АҚ пен словакиялық “ZOS-VYVOJ” s.r.o. компаниясымен біріге отырып, дизельді рельсті жылжымалы құ­рам шығаратын бірлескен кә­сіп­орынға құрылтайшылық жасау. Жаңа кәсіпорын “Алматы вагон жөндеу зауыты” АҚ базасында құ­рыл­мақ. “ZOS-VYVOJ” s.r.o. ком­паниясы кәсіпорынға 30 млн. дол­лар көлемінде инвестиция бөліп, соңғы үлгідегі технологиямен қам­тамасыз етпек. Дизельді рельсті пойыздар қалааралық бағыттарда  жолау­шылар тасымалдауға арна­ла­ды. Сондай-ақ теміржолшыларды жол жөндеу орындарына жет­кізуге де пайдаланылатын болады. Бір­лес­кен кәсіпорын жылына 10 жыл­жымалы құрам шығаруды жос­парлап отыр. Екінші құжат – Қорғаныс министр­лі­гі мен Словакия Республикасы Үкіметінің арасында “Әскери қа­бі­рлер туралы үкіметаралық келі­сім”.  Келісім екі мемлекет аума­ғын­­дағы әскери қабірлерді анық­тап табу мен оларға санақ жүргізу, соғыс құрбандары мүрделерін жер­леуге қатысты мәселелерді шешуге байланысты болып отыр. Венера ТҮГЕЛБАЙ.