Видео • 02 Наурыз, 2020

Елордада инватакси көліктерінің саны артты (видео)

257 рет
көрсетілді
2 мин
оқу үшін

Елордада инватакси көлігінің саны артып, мүмкіндігі шектеулі балаларға кресло-арба сыйға тартылды. Демеушілік қаражат есебінен 10 арнайы көлік сатып алынды. Бұл туралы қала әкімдігінің баспасөз хатшысы Ақмарал Олжабаева хабарлады.

Елордада инватакси көліктерінің саны артты (видео)

"Қайрат Боранбаев еліміздің жетекші меценаттарының бірі. Ол мүмкіндігі шектеулі адамдарға жағдай жасауға көмектесіп, инватакси мәшинесін сатып алуға ниет білдірді. Бұл көліктер соңғы әлемдік стандарттарға сай жабдықталған және бейімделген", - деді "Алмалы" АА вице-президенті Бақыт Сапаров.

Елорда әкімі Алтай Көлгінов қатысушыларды Алғыс күнімен құттықтап, ерекше қажеттілігі бар адамдарды қолдау үшін қандай шаралар қабылданатынын атап өтті.

"Мемлекет ерекше қажеттілігі бар адамдарға қолдау көрсетуге ерекше көңіл бөледі. Қала тұрғындарымен кездесу барысында олар арнайы көліктердің жұмысы туралы бірқатар мәселе айтты. Қайрат Советайұлына, үкіметтік емес ұйымдардың өкілдеріне және басқа да меценаттарға көрсеткен қолдауы үшін алғыс айтамын. Соңғы уақытта инватаксидің саны екі есе өсті. 22-ден 46 дейін көлік санын арттырдық. Алдағы уақытта да қолдау көрсетіп, қажетті шаралар қабылдайтын боламыз", - деді қала әкімі Алтай Көлгінов.

Елордада ерекше қажеттілігі бар 27 мың адам тұрады, оның 5,5 мыңы балалар. Қалада екі оңалту орталығы салынады, қазір иппотерапиямен айналысуға арналған ат спорты кешенінің құрылысы жүргізіліп жатыр. Қалалық аурухана базасында Тұңғыш Президент Қорымен бірлесе оңалту орталығы ашылады. Бұдан басқа, жаңа тұрғын үй кешендерінің бірінші қабаттарында балаларға арналған шағын орталықтар, оңалту орталықтары, емханалар сияқты әлеуметтік нысандар ашылады.

Елордада мүмкіндігі шектеулі адамдарға спортпен айналысу үшін білікті қызметкерлері бар заманауи екі спорт кешені ұсынылған: паралимпиадалық жаттығу орталығы және "Тарлан" мұз айдыны.