Финалға жолдама алды

Өз елімізде өткен бәсе­кеде жерлес­те­ріміз Қызғал­дақтар елінен келген спорт­­шыларды мерзімінен бұ­рын жеңіп, қара­ша айында Мадридте (Испания) өте­тін Дэвис кубогының фи­налдық сайысына жолдама алды. Бір қызығы, Қа­­зақстан мен Нидерланд құ­рамалары Дэвис кубо­гының былтырғы финал­дық кезеңінде бір топта ойнаған болатын. Сол кезде де жерлестеріміз қар­­сы­ластарынан басым түскен еді. Екі коман­да арасындағы тартыс 2:1 есебімен аяқтал­ған-ды. Жекелей сында Ми­хаил Кукушкин Ботик ван де Зандшульпті ұтса, Алек­сандр Бублик Робин Хаасеге есе жіберді. Ал жұп­­тық бәсекеде біздің жі­гіттер қарсыластарының уы­­сынан жеңісті жұлып әкетті. Алайда айтулы ко­ман­даның екеуі де шешуші тұста Ұлы­британияға жол беріп, ширек финалға шыға алмаған болатын.

Елордада өткен бәсе­кеде жігіттеріміз еш қиын­дықсыз жеңіске жетке­німен, турнир біздің спортшылар үшін аса сәт­ті бас­тала қойған жоқ. Бір күн бұрынғы жеребе тарту рәсімі өтіп, жарыс­тың шымылдығын ашу Ми­хаил Кукушкин мен Ро­бин Хаасеге бұ­йырды. Жал­пы, Хаасе қазақ тен­нис­шілері үшін өте ыңғай­сыз қар­сы­­лас. Дэвис ку­богы­ның былтырғы фи­нал­­дық бәсекесінде дәл осы теннисші біз­дің Алек­сандр Буб­ликті жеңіп кет­кен болатын. Бұл жолы да Ни­дерланд спортшысы Михаил Кукушкинді қа­пы қалдырды. Тартысқа толы өткен кездесуде Ро­бин Хаасе 4:6, 7;6, 3:6 есебімен же­ңіске жетті.

Кукушкиннен кейін корт­қа шыққан Александр Бублик жанкүйерлердің және құрамадағы жігіттер­дің жеңіске деген сенімін оятты. Дегенмен отандасы­мыз жеңіс үшін кортта біраз тер төгуге тура кел­ді. Әлемдік рейтингте 199-сатыға табан тіреген Грикспур Қазақстанға же­ңіс үшін келгенін анық аңғартып, жерлесімізге біраз қарсылық көрсеткенін айта кетейік. Бублик 23 жас­тағы қарсыласы Таллон Грикспурді екі сетте 7:6, 7:6 есе­бімен же­ңіп, таразы ба­сын теңестірді.

Екінші жарыс күніндегі жұптық бәсекеде Андрей Голубев пен Александр Не­­довесов тандеміне Жан-Жульен Ройер мен Робин Хаасе еш қарсылық көрсете алмады. Екі сетке созылған бәсекеде жер­лестеріміз 6:3, 6:3 нәтижесімен басым түсті. Жалпы есепте алға шық­­қаннан кейін бар үміт еліміздің бірінші ракеткасы Александр Бубликке артылды. Өйткені Бублик ж­еңіске жететін болса, жер­лестеріміз мерзімінен бұ­рын Мадрид жолдамасын иеленеді. Егер тең түссе, мәселені соңғы кездесуде шешуге тура келеді.

Осындай жауапкерші­лікті арқалаған Александр Бубликтің же­ңілуге ха­қысы жоқ еді. Оның үсті­не қар­сыласы – Робин Хаа­се. Былтыр кеткен есе­ні қай­таруға тамаша мүмкіндік. Және Бублик ол мүмкіндігін қолдан бер­ген жоқ. Бірінші сетте отандасымыз аздаған ба­сымдықпен, яғни 7:6 есе­бі­мен жеңіске жетті. Екін­­ші сетте қар­қынына қар­қын қосып, қар­сыласын 6:1 есебімен шаң қап­ты­рып, Қазақ­стан құрама­сына же­ңіс сыйлады.

Нидер­ланд құр­масын 3:1 есебімен жең­ген жерлес­те­ріміз екінші жыл қа­тарынан Дэвис кубогының финал­дық кезеңінде ой­науға мүм­кіндік алды.