Ерлер арасындағы бәсекеде бірінші болып Олимпиада жолдамасын 69 кило салмақта жұдырықтасқан Абылайхан Жүсіпов иеленді. Жүсіповтен кейін шаршы алаңға көтерілген Әбілхан Аманқұл, 2019 жылғы әлем чемпионы Бекзат Нұрдәулетов (81 кг), Рио Олимпиадасының күміс жүлдегері Василий Левит (91 кг) және аса ауыр салмақтағы әлем біріншілігінің күміс жүлдегері әрі команда капитаны Қамшыбек Қоңқабаев та қарсыласын еш қиындықсыз жеңіп, Жапонияда өтетін Олимпия ойындарына жолдама жеңіп алды.
Қыздар арасында өнер көрсеткен 19 жастағы отандасымыз Надежда Рябец те бапкерлер үмітін ақтап, Олимпиадаға бару құқығын иеленді. Айта кетейік, Рябец 2018 жылы Жасөспірімдер Олимпиадасына қатысып, қола жүлдегер атанған-ды.
