Құрылысы өткен жылы шілде айында басталған жобаның жалпы құны – 1,55 млрд теңге. Меншік иесі – «Сарыағаш ауданы су шаруашылығы» мемлекеттік коммуналдық мекемесі. Құрылысқа жауапты мекеме – «Гидроқұрылыс» ЖШС-ы. «Аудандағы 1300 гектар аумақты ағын сумен қамтитын каналды бетондау жұмыстары биыл желтоқсан айында толық аяқталады. Бұған дейін каналдың су өткізу қабілеті секундына 5 текше метрді құраса, құрылысы біткеннен соң бұл көлем едәуір арта түсетін болады. Бұдан бөлек, канал бетондалғаннан соң 1500 гектар егістік жерді ағын сумен қамтамасыз етіп, су үнемділігі 30 пайызға жетеді», дейді «Сарыағаш су шаруашылығы» ЖШС директорының орынбасары Нұрғали Арызқұлов.
Айта кетелік, Сарыағаш ауданы бойынша 9 мың гектар суармалы жер бар. Бұл көлем жыл санап артып келеді. Осы егістік алқаптарды ағын сумен қамтып отырған ірілі-ұсақты 20 канал бар.
