– Түркістан облысы аумағында суқоймалардағы жағдай қалыпты, тұрақты бақылауда, – деді Төтенше жағдайлар департаментінің басшысы Нұрғали Жүнісов. Жалпы, облыс бойынша суқоймалардың орташа толуы 45-50%-ды құрайды. Облыста болуы мүмкін төтенше жағдайдың алдын алу іс-шаралары дер кезінде және сапалы орындалуда. Суқоймалар мен өзендерге күнделікті мониторинг жүргізілуде. «Бүгінде Шардара су қоймасында – 4185 млн текше метр су бар, толуы – 80%, шығып жатқан су көлемі – секундына 400,5 текше метр. Ал Көксарай су реттегішінде жиналған су қоры – 1061,88 млн текше метр, толуы 35%-ды құрап отыр», деді департамент бастығы.
Өңірде орналасқан 40 суқойманың 18-і республикалық, 17-сі қала, аудандық коммуналдық меншікте болса, 5-еуі жекеменшік иелігінде. Яғни қараусыз қалған суқоймалар жоқ. Сырдария өзенінен бастау алатын каналдардың бас тоспасы бекітілген. Қапталған 53 тонна құм, 584 шатыр, 4622 кереует, 36 мың адамға арналған төсек-орын дайындалған. Сондай-ақ облыс аумағындағы өзендердің 26,9 шақырымына жаға бекіту және арна түзеу жұмыстары жүргізілсе, 29,9 шақырым қорғаныс дамбасы тұрғызылыпты. Арық-атыздардың арнасы, каналдар да тазартылған. Ал Шардара суқоймасында жүргізіліп жатқан сейсмикалық төзімділікті күшейту және жөндеу бойынша ауқымды жұмыстарды аяқтау келер жылдың желтоқсанына жоспарланған.
Түркістан облысы