21 Тамыз, 2013

Отбасымен түгел алаяқ болып шықты

325 рет
көрсетілді
2 мин
оқу үшін

Көлденең табысқа құнық­қандардың айла-шарғысы тереңдеп бара жатқандығы соншалық, онымен отбасылық топтар да айнала бастағаны қоғамды алаңдатып отыр. Осындай жағымсыз оқиға Көкшетауда да тіркеліп, эконо­микалық және сыбайлас жемқорлық қылмысқа қарсы күрес департаменті тарапынан әшкереленді.

Көлденең табысқа құнық­қандардың айла-шарғысы тереңдеп бара жатқандығы соншалық, онымен отбасылық топтар да айнала бастағаны қоғамды алаңдатып отыр. Осындай жағымсыз оқиға Көкшетауда да тіркеліп, эконо­микалық және сыбайлас жемқорлық қылмысқа қарсы күрес департаменті тарапынан әшкереленді.

Бір қызығы, Б.Қасымов жетек­шілік еткен ұйымдасқан қылмыстық топтың құрамындағы С.Қасымова және Б.Аманов өз құдығына түкіргісі келмегендей, Көкшетауды айналып өтіп, республикамыздың өзге өңірлеріндегі беделді мекемелерге қармақ тастап отырыпты. Ең өкініштісі, сол абыройлы ұжымдардың барлығы қитұрқылық құрбаны болып қалғандарын енді байқап отыр. Б.Қасымовтың тобы 2012 жылдың мамыры мен 2013 жылдың ақпаны аралығында «Казводхоз» РМК Қ.Сәтбаев атындағы каналдың, Семейдегі «Консультативті-диаг­ностикалық ор­талығының», Пав­лодардағы «Мемлекеттік ве­домстводан тыс жобалар сарап­­тамасы» кәсіпорнының, Орал­дағы «Информациялық технологиялар колледжінің», Қоста­найдағы «Сарыкөл орталық ауру­ханасының», Ақтөбедегі «Шалқар аудандық емханасының» және бизнестің майын шағып отырған Алматы қаласының үш мемлекеттік мекемесінің 11134700 теңгесін еш қиналмай майлы қоржынға сала салған.

Алдын ала тергеу, сот сараптамасы, куәлер мен күдіктілердің жауаптары барысында ұйымдасқан қылмыстық топтың жалған кәсіпкерлік арқылы мемлекеттік сатып алу тендерлеріне қатыс­қандығы анықталып, жасалған қылмыс толық мойындарына ілінді.

Көкшетау қалалық сотының үстіміздегі жылғы 16 тамыздағы үкімімен Б.Қасымов пен Б.Ама­новтың әрқайсысы 7 жыл 6 айға, С.Қасымова 6 жылға бас бостандығынан айырылып, жазаларын жалпы режімдегі колонияда өтейтін болды.

Бақберген АМАЛБЕК,

«Егемен Қазақстан».

Ақмола облысы.