Шараға жауапты әскери құрылым – Ұлттық ұлан 5 мамырға дейін эстафетаны аяқтауы тиіс. Жеңістің 75 жылдығына арналған тағылымды шараның басты мақсаты - тарихқа тағзым ету, өткен ғасырдың бел ортасында бүкіл адамзат баласының басына қара бұлт болып үйірілген фашизмге қарсы қанды соғыста ерлік көрсеткен майдангерлердің ерлігін өскелең ұрпаққа өнеге ету.
Ішкі істер министрлігінің бастамасымен биыл 5 ақпанда «Біз – Жеңістің мұрагеріміз» деген ұранмен басталған эстафетаны қарсы алу шарасы бүгін Қостанайдағы Жеңіс саябағында өтті. Жиында Қостанайдағы Ұлттық ұлан сарбаздары Ақтөбе қаласынан жеткен Жауынгерлік туды салтанатты түрде қабылдап алды.
- Жеңістің мерейтойына байланысты республика көлемінде 600-ден астам шаралар ұйымдастыру жоспарланған. Ал бұл эстафета еліміз бойынша 11 мың шақырымды жүріп өтіп, 40-тан астам әскери бөлімде аялдамақ. Қостанайда біз жеке құраммен бірге тәрбиелік сағаттар мен тағылымды кештер ұйымдастырып, көзі тірі ардагерлермен кездесу өткіземіз. Сондай-ақ, қарт майдангерлердің үйлеріне барып құттықтап шыққымыз келеді. Мектеп қабырғаларында патриоттық дәрістер өткізбекпіз, - деді Ұлттық ұланның «Орталық» өңірлік қолбасшысының тәрбие және әлеуметтік-құқықтық жұмыстар жөніндегі орынбасары полковник Қанат Беляков.
Панфиловшылар туының көшірмесі Қостанайда екі күн болып, Көкшетауға қарай жол тартады.
Қостанай
