Шаңырақтың иесі марқұм Анарбай Қожамбердиев 2005 жылы қайтыс болған. Алтын құрсақты ананың үлкен ұлы Жұман 62 жаста болса, үйдің кенжесі Перизат 38 жаста. Бүгінде Әнжір әже кенже ұлы Ерлан мен келіні Сәрсенкүлдің қолында, бес немеренің қылығы мен еркелігін қызықтап, тәлім-тәрбиесіне өз үлесін қосуда. Жуырда «Ауыл» партиясының өкілдері көп балалы ананың шаңырағында қонақта болды.
«Ауыл» халықтық-демократиялық патриоттық партиясының төрағасы Әли Бектаевтың құттықтауын жеткізген Түркістан облыстық филиалының төрағасы Нұржан Әжіметов Әнжір әжеге орамал жауып, бір құшақ раушан гүлі мен арнайы сыйлығын табыс етті. «Біз жастарға алтын құрсақты, дүниеге көп бала әкелген асыл аналарымызды көбірек насихаттауымыз керек. Менің өмірден бір түйгенім, осындай көп балалы отбасыдан шыққан балалар бауырмал, бір-біріне жанашыр, мейірімді болып келеді. Қазір жастар бір-екі баламен шектелгенді жөн көреді, меніңше ондай балалар өзімшіл болып өседі. Сондықтан бір-екі баламен тоқтамай, көп балалы болған жақсы деп ойлаймын», дейді Нұржан Әжіметов.
Өзін арнайы іздеп келіп, құрмет көрсеткен партия өкілдеріне алғысын білдірген қария қуаныштан көзіне жас алды. «Дендерің сау болсын, менің жасыма жетіңдер! Өмір бойы осы ауылда еңбек етіп, зейнетке шықтым. Қой да бақтық, марқұм шалымыз екеуміз темір жолда да жұмыс істедік. Балаларым, ұрпағым аман болсын, осылардың арқасында аман-есен немере-шөберелерімнің қызығын көріп отырмын. Сендерге де жұғысты болсын, еліміз аман, аспанымыз ашық болсын!», деп Әнжір әже қонақтарға ақ батасын берді.
Түркістан облысы
