Мысалы, Сайрам ауданында бүгінде 100-ден астам шаруашылық 145,8 гектарға картоп, қырыққабат, сәбіз, пияз, сарымсақ, нохат, қияр мен тәтті бұрыш еккен. Ауданда 100-ден астам шағын және ірі жылыжай жұмыс істейді. Яғни, елімізде жарияланған төтенше жағдай диқандар жұмысына кедергі келтірген жоқ.
Сайрам ауданына жұмыс сапарымен келген облыс әкімі Өмірзақ Шөкеев диқандардың тыныс-тіршілігімен танысты. Облыс басшысымен жүздескен шаруа қожалықтары мен жылыжайлардың иелері өз мәселесін ортаға салды. Өмірзақ Естайұлы диқандарды өтпелі кезеңнің қиындықтарына төтеп беріп, алаңдамауға шақырды. Керісінше, жұмысты күшейтуді тапсырды.
- Шаруалар назардан тыс қалмайды. Елдегі төтенше жағдайға байланысты ауыл шаруашылығы саласының ақсауына жол берілмейді. Керісінше, қайта жұмысты күшейту қажет. Мемлекет тарапынан қолдау көрсетіледі. Қосымша қажеттіліктер туындап жатса, қарастырылады, - деді облыс әкімі.
Ауыл шаруашылығы өнімдерімен толық қамтамасыз ету мақсатында шаруа қожалық иелері егістік жерден екі-үш рет өнім алуды тоқтатпаймыз деп отыр. Аудандағы бірнеше шаруа қожалықтардың жұмысымен танысқан облыс әкімі Қолкент ауыл округіндегі инженерлік - коммуникациялық жүйелерінің құрылысы нысанында болды. Мекеме ауыз су, электр желісі, су құбыры жобаларын іске асырады. Сондай-ақ Өмірзақ Шөкеев аудандағы құрамажем шығаратын зауыттың ұжымымен кездесті. Осыған дейін Өзбекстан, Ауғанстан, Иран елдеріне экспорт жасайтын өндіріс орны жоспарға сәйкес жұмыс істеуде.
Түркістан облысы
