Қазір аймақта індеттің алдын алу мақсатында кешенді шаралар жасалып жатыр. 70 төсек инфекциялық ауруларды қабылдауға, 280 төсек провизорлық тексеру жасау үшін, 600-ге жуық төсек карантинге жатқызуға дайын. Бүгінгі күні 100-ге жуық адам ауруханаларда карантинде жатыр. 400-дей тұрғын тексеріліп, карантиннен шықты. Кеше түнде 70-ке жуық ҚР азаматы Ыстамбұлдан Ақтауға ұшып келді. «Тәжен» шекаралық бақылау бекеті арқылы Өзбекстаннан 14 Маңғыстау облысының тұрғыны келді. Барлығы тексеріліп, арнайы көліктермен Ақтауға жеткізіліп, карантинге жатқызылды. Сараптама қорытындысы теріс нәтиже берген жағдайда үйлеріне карантинге жіберіледі.

Айта кетейік, 24 наурыз күні Қарағанды қаласына Варшава қаласынан студенттер келген болатын.  Олардың 6-ы Маңғыстау облысынан. Қарағандыға келген бойда вирусқа тексеруден өтіп, теріс нәтижелі жауап алды. Бүгін Ақтауға жеткен студенттер қайта тексеруден өтіп, үйлеріне жіберілді. 14 күн үйлерінде карантинде жатады. Студенттерден сыртқа шықпауға қолхат алынды.

Аймаққа келген кез-келген тұрғын әуежайда, теміржол вокзалдарында, автожолдарға қойылған бекеттерде медициналық тексеруден өтіп, дене қызуы өлшенеді.

Әр аймақта адам ағзасынан Covid-19 инфекциясын анықтайтын вирусологиялық зертхана бар. Облыста сараптама жасайтын құралдар жеткілікті мөлшерде. Барлығы тегін жасалады.

Медицина қызметкерлері күшейтілген режимде жұмыс істеуде. Дәрігерлер егер қызуы көтеріліп, өзін жайсыз сезінген тұрғын болса, бірден жергілікті емханаға немесе CALL-орталықтарға телефон шалуы қажеттігін айтады. Учаскелік дәрігердің кеңесінен соң, қажет болған жағдайда жедел-жәрдем жіберіледі. Емханаға немесе ауруханаға барудың қажеті жоқ.

Дәрігерлер сақтық шараларын қатаң сақтауды, жеке бас гигиенасын сақтап, көпшілік жиналатын жерлерге бармауды, қажет болмаса үйден шықпауды ескертеді.

Маңғыстау облысы