«Жамбылдық еріктілер осы уақытқа дейін 30 мың үнқағаз, бүктемелер мен медициналық маскалар таратып, 15 рейд ұйымдастырды. Сонымен қатар, әлеуметтік аз қамтылған, көпбалалы және жалғызілікті қарияларға «Біз біргеміз» ұранымен бірінші кезектегі қажетті 700 дана азық-түліктер мен гигиеналық заттар салынған қораптар үлестірді», дейді Жамбыл облыстық жастар саясаты мәселелері басқармасының басшысы Серікбол Берікқожа. Сондай-ақ, ол аталған басқарманың «Қоғамдық сақшы» жобасын жыл басынан бері жүзеге асырып келе жатқанын жеткізді. Оған «Жібек жолы», «Ақ сұңқар», «Темірқазық» волонтерлік қозғалыстары мен өңірдегі «Jas Otan» Жастар қанаты, «Қазақстан студенттер Альянсы» және «Жас сарбаз» әскери-патриоттық жастар ұйымының еріктілері тартылған. Аталған жоба аясында еріктілер мереке күндері қадағалау шараларына атсалысып, саябақтарда, көшелерде және мөлтекаудандарда түсіндіру жұмыстарын жүргізген. Олар мейрамханалар, ойын-сауық орталықтары, кафелер мен асханалардың сағат 22.00-ден кейін жабық болуын облыстық полиция департаменті қызметкерлерімен бірлесе қадағалап, арнайы рейдтік жұмыстарға қатысуда.
Жамбыл облысы
