Мемлекет басшысы Қасым-Жомарт Тоқаев Twitter-дегі парақшасында: «Санитарлық-эпидемиялық саладағы күрделі кезеңде еңбек етіп жатқан дәрігерлерді қаржылай қолдаудың жаңа пакеті қажет. Олар соған лайықты», деді. Осыған орай кеше Премьер-Министр Асқар Мамин Мемлекеттік комиссияның отырысын өткізіп, арнайы шешім қабылданды. Онда медицина қызметкерлері жұмысының қауіптілігіне қарай 3 топқа бөлінген.
Дәурен Абаев ең алдымен осы топтарды атап өтті. «Бірінші топ – бұл реанимация бөлімдерімен қоса алғанда, жұқпалы аурулар стационарларының дәрігерлері, орта және кіші медицина қызметкерлері. Барлығы – 3284 маман. Олардың жалақысына үстемеақы айына 850 мың теңгені құрайды. Яғни, орташа айлығын қосқанда, олар айына шамамен 1 миллион теңгенің үстінде алады. Екінші топ – провизорлық стационар мен жедел жәрдем қызметінің дәрігерлері, орта және кіші медицина қызметкерлері.
Барлығы – 11 951 маман. Олардың үстемеақысы айына 425 мың теңгені құрайды. Яғни орташа айлығын қосқанда, олар айына шамамен 600 мың теңге алады. Үшінші топ – карантиндік стационар дәрігерлері, орта және кіші медицина қызметкерлері, санитарлық дәрігерлер, жедел-жәрдем жүргізушілері және т.б. Барлығы – 10 993 қызметкер. Олар айына 212 мың теңге үстемеақы алады. Яғни орташа айлығын қосқанда, олар шамамен 380 мың теңге алады», деген министр медицина қызметкерлерінің денсаулығы мен өмірін сақтандыру мәселесі де пысықталғанын жеткізді. Яғни олар ауырып қалған жағдайда 2 млн теңге мөлшерінде сақтандыру төлемі беріледі. Ал қайтыс болған жағдай кездессе, 10 млн теңге мөлшерінде төлемақы беріледі.
Бұдан бөлек волонтерлер мен меценаттар да қайырымды істі қолға алып жатқанын жеткізген Д.Абаев: «Елімізде күн сайын жүздеген волонтер, меценат қайырымдылық жасауда. Өнер адамдары онлайн-концерт беруде. Одан басқа да мейірімділік шаралары көп. Осының барлығы рухымыздың мықтылығын дәлелдейді. Бұл шараға бизнес өкілдері де атсалысуда. Мысалы, «Кар-Тел», «Кселл», «Мобайл Телеком-Сервис» компаниялары коронавируспен күресіп жатқан барлық дәрігерлерді тегін ұялы байланыспен қамтамасыз етті. 20 мыңнан астам медицина қызметкеріне тегін байланыс және интернет пакеті берілді», деді.
Мемлекеттің өз азаматтарына деген қамқорлығы осындай қысылтаяң сәтте көрінеді. Осыны айтқан министр Президенттің тапсырмасымен 18 наурыздан бастап шетелдегі 7702 Қазақстан азаматы мемлекет көмегімен елге жеткізілгенін, тағы 752 азаматты әкелу жұмыстары ұйымдастырылып жатқанын атап өтті. Бұл мәселелер Мемлекет басшысының ерекше бақылауында.
