Әңгімелесу барысында Израиль саясаткері коронавирус індетінің таралуына қарсы күресте Қазақстан халқы мен Үкіметіне қолдау көрсететінін айтты.
Оның айтуынша, Израиль Қазақстан Президентінің COVID-19 вирусының одан әрі таралуына жол бермеу, шағын және орта бизнесті қолдау, сондай-ақ, халық алдындағы әлеуметтік міндеттемелерді орындау жөніндегі нақты іс-қимылдары мен шешімдерін мұқият бақылап отыр. Реувен Ривлиннің пікірінше, Қазақстан дағдарысқа қарсы барлық шараларды дер кезінде қабылдады және оның бәрі пандемия жағдайында елдің қауіпсіздігін қамтамасыз етуге бағытталған.
Израиль Президенті қазіргі уақытта бүкіл әлем миллиондаған адамның жаппай індет жұқтыруын болдырмау үшін қатаң қадамдарға барып, тіпті, оқшаулауға және төтенше жағдай жариялауға мәжбүр болып отырғанын айтты.
Қасым-Жомарт Тоқаев коронавирус індетінің Екінші Дүниежүзілік соғыстан кейінгі адамзатқа төнген аса қауіпті қатер екенін атап өтті.
- Бүгінде бүкіл әлем пандемиямен оның салдарына тиісті жауап беру мақсатында күш біріктіріп, жұмылуы қажет. Осыған орай Қазақстан аталған қатерге қарсы тұру үшін өңірлік және халықаралық деңгейдегі ынтымақтастықты жалғастыруға ниетті, - деді Мемлекет басшысы.
Реувен Ривлин екіжақты қарым-қатынастарды талқылай отырып, Қазақстанмен саяси, экономикалық және мәдени-гуманитарлық ынтымақтастықты одан әрі нығайтуға қызығушылық білдірді. Осыған байланысты ол Қазақстан Президентін 2020 жылы күзде Израильге сапар жасауға шақырды.
Қазақстан Президенті шақыруды ілтипатпен қабыл алды және жаһандық пандемияның салдарын жойғаннан кейін Израильмен арадағы екіжақты байланыстардың даму қарқыны толық қалпына келетініне сенім білдірді.
