Руханият • 06 Сәуір, 2020

Ардагерлер ансамблі

43 рет көрсетілді

Елордамыздағы «Есіл толқын­дары» ардагерлер ансамблі осыдан тура бір жыл бұрын Нұр-Сұлтан қаласындағы Есіл аудан­дық әкімдігінің жанынан құрылған болатын. Таяуда бас қаладағы Достық үйінде бір жылдық есепті концерт берді.

Ансамбльдің құрамында кеше жалындап еңбек еткен, ал бүгін зейнет­керлік демалыста жүрген ардақты аға­лар мен ақ жаулықты әжелер бар. Алды 70-тен асып, кейінгілері алпыстың ар жақ, бер жағында аяңдап жүрген аяулы жандар десек қателеспейміз. Олардың басқа өнерпаздардан ерек­шелігі сол бір сағаттық қойылым­дағы әндердің бәрі жанды дауыста орындалды. Концерттік бағдар­ла­маның бас жағындағы Абай әнде­рінен дайындалған композиция салмақтылығын аңғартты. Бірнеше дауыста орындалған хакім Абай ән­дері көрерменнің көңіл көкжиегіне жы­лылық ұялатты. Бұл нөмірді ұлы Абайдың 175 жылдық тойына ар­налған десек те артық емес. Бұ­дан соң ұмытылып бара жатқан, бүгінгі жас толқын бірде естіп, бірде естіп те көрмеген халқымыздың қазы­на­лы әндерінен, ретро әндерден сы­зылт­қан Нұрсәуле Алдажұманова, Есбол Қошаев, Алмабек Бердіғалиев, Ал­тынбек Бейсенбаев, Жібек Қайыр­бекова, Хамитбек Махмұтұлы, Сар­тай Нұра­қышев, Фарида Нұрдиль­дин секілді ардагер аға-апалардың әдемі де, таза дауыстарын естіген кө­рер­мен дүркірете қол соғып, рия­сыз ризашылықтарын білдірді. Бағ­дарламаның соңғы бөліміндегі Біржан мен Сара либреттасынан үзінді сәтті шықты. Жарқылдаған сахналық кос­тюмдер, әсем ән, таза үн, жанды дауыс кө­рер­меннің көңілін тебірентті.

Концерт соңында сөз алған Есіл ауданы әкімнің орынбасары Дәрме­нияр Қыдырбекұлы мен Астана қала­сы ардагерлер кеңесінің жауапты қыз­­­­меткері Салтанат Меңлібаеваның, Есіл ауданы ардагерлер кеңесінің төр­айымы Рысты Тұрғынбекқызының құт­тық­тауынан кейін әкімдік атынан та­быс­таған ықылас гүлі шынайы риза­шы­лықтың белгісіндей үлкен­дерге жа­салған құрмет деп бағаладық.

Жалпы концерттің жинақы өтуіне, орындалған әндердің әншілердің дауысы­на сай таңдалуына жоғары білімді музыка маманы, доцент, ансамбль же­текшісі Фа­нида Нұрбаева мен бесаспап өнерпаз, ансамбль мү­шесі Қарлығаш Құспанова, музыкамен сүйемелдеуші, бая­нист Мейрам Елу­баев көп еңбек сіңірген.

Жыл ішінде ұйымшыл өнер ұжымы қаладағы көптеген мәдени-көпшілік ша­раларға қатысып, халықтың ыстық ықы­ласына бөленгенін де айтқан орынды.

 

Әйгерім Сейсенбина,

ансамбльдің әншісі

Соңғы жаңалықтар

Ұқсас жаңалықтар