Yessenov University қашықтан оқыту технологиясын қолданып білім беруде үлкен тәжірибесі бар. Сондықтан 7807 білім алушыға қашықтан оқыту технологиясы арқылы білім беру сапасының жоғары деңгейде болуына жіті назар аударып отыр.
Қазір заманға сай барлық электронды коммуникациялық құрылғыларда және мобильді платформаларда жұмыс істейтін G Suite құрамындағы Meet by Google Hangouts қосымшасын университет білім алушылары қашықтан білім алуда оңай қолдана алады.
Yessenov University-де Қытай, Иран, Ресей, Пәкістан, Армения және т.б. елдерден келіп білім алып жатқан 1668 шетел азаматына қашықтан сапалы білім алуына барлық жағдай жасалуда. Жатақханалар шетелден келіп білім алып жатқан және еліміздің шалғай аудандарынан келген білім алушылар үшін жоғары жылдамдықтағы 100 мбит/сек кең жолақты wi-fi интернетімен қамтамасыз етілген.
Yessenov University білім алушыларға оңтайлы жағдай жасау үшін Meet by Google Hangouts қосымшасында 184 виртуалды аудитория жасақталып, университеттің 313 профессор-оқытушылар құрамы бекітілген сабақ кестесіне сәйкес on-line форматта дәріс беруде.
Университеттің кітапхана қоры «Цифрлы Қазақстан» бағдарламасына сәйкес сканерлеу арқылы электронды түрге аударылды.
– Студенттер электронды кітапханаға Интернетке қосылған кез келген компьютер не мобильді құрылғы арқылы қол жеткізе алады. Қажетті кітапты табу қиындық туғызбайды. Электронды кітапхананың міндетті элементтерінің бірі – сатылы электронды каталог, ол кітапты қосу не жою шараларына байланысты автоматты түрде толықтырылады және жаңартылады. Сонымен қатар студенттерге әлемге әйгілі Coursera, wizer сияқты электронды құралдармен цифрлы білім беру көздері қолжетімді. Барлық пәндер бойынша университеттегі «Univer» оқу жүйесіне оқытушылар тарапынан 1722 электронды оқыту кешені (қазақ, орыс және ағылшын тілдерінде) жүктеліп, электронды журналға бағалар қойылуы қарастырылған, – дейді оқу орнының ректоры Берік Ахметов.
Білім алушыларды google account және бейне аутентификациялау негізінде кестеге сәйкес сабаққа қатысулары YU Monitoring center (мониторинг орталығы) арқылы жүйелі түрде тексерілуде. Сондай-ақ студенттер жазба жұмыстарын тапсыру үшін оқытушылардың корпоративті пошталарына жұмыстарын жібереді. Жазба жұмыстарды білім алушының өзі орындағанын тексеру туралы ережеге сәйкес оқу үрдісінің тиімділігін арттыру мен ұйымдастырудың сапасын көтеру үшін білім алушылардың жазба жұмыстарды дербес орындауын бақылау, сондай-ақ білім алушылардың өзіндік тәртіп деңгейін арттыру және зияткерлік меншік құқығын сақтау мақсатында «Антиплагиат» жүйесі қолданылады. Жазба жұмысы қорғауға жіберілуі үшін жұмысқа рұқсат беруді қарау кезінде жазба жұмыстың түпнұсқалығы 80%-дан асу қажет.
2017 жылы университет базасында арнайы телестудия жасақталған болатын. Студияда университеттің үздік оқытушылары бейне лекцияларын даярлап, университеттің оқу платформасына жүктеледі. Бұдан екі жыл бұрын университетте іске қосылған оқу моделі арқылы студенттер бейне-лекциялар бойынша үйінде дайындалып, ал сабақта түсінбеген мәселелері бойынша оқытушымен пікір алмасады.
Аталған жоба бойынша биылғы жылы университет базасында VR зертханалары ашылып, техникалық бағыттар бойынша виртуалды зертханалар жасақталады.
Заманауи білім беру құралдарымен жабдықталудың пайдасы болмаса зияны жоқ екенін Ақтаудағы оқу орнында дер кезінде қолға алынған шаралар айқындай түсті.
Маңғыстау облысы
