Аймақтар • 15 Сәуір, 2020

Үй бетін көрмей күресуде

15 рет көрсетілді

Петропавлда жаман індет шарпыған жандар №1 қалалық аурухананың инфекция бөліміне орналастырылған. Жуырда облыс әкімі аталған нысанға өкпені жасанды желдететін бес жаңа аппарат сыйлаған болатын.

Инфекциялық бөлімшенің меди­ци­налық қызметкерлері жанк­еш­тілік­пен әрекет етіп жүр. Соның нәти­жесінде өлім-жітім жоқ, жуыр­да бір жас әйел емделіп, аурухана­да­н шықты. Бас дәрігер Ботагөз Сү­лейменова: «Әріптестеріміз өз міндет­терін адал атқаруда. Дәрігер­лер Ғалия Сыздықова, Айнагүл Қасы­ба­ева, Әубәкір Омарәлиев, медбикелер Штоль, Широченко, Побережник, Сергеева, бәрі де өз істеріне берілген, адал қызмет етіп жүрген жандар. Ал бө­лім­шенің санитар-тазалықшылары Айтмағамбетова, Қадырова, Рожкова, Баженова, Луценколар да тек жоғары бағаға лайықты», деді.

Қазір бөлімшеде 24 науқас бар. Дерттің беті қатты болса, дереу өкпе­ні жасанды жолмен желдететін ап­пар­атқа жатқызылады. Ал емдеу бары­сы республикалық мамандардың анық­та­ған әдістерімен жүргізілуде. Қажетті дәрі-дәрмектер жеткілікті. Науқасқа ауру­ханаға түскеннен 14 тәуліктен кейін сараптама жасалады. Егер инфек­ция жоғы анықталса, дереу үсті-басы толықтай дезинфекцияланып, үйіне арнаулы көлікпен жеткізіледі.  Ал дәрігерлер, медбикелер және тазалықшылар үйлеріне жіберілмейді. Бір күндік ауысымын атқарған соң олардың үсті-басы тегіс дезинфекцияланып, арнаулы көлікпен, ешқайда шығармай «Алтын орда» қонақүйіндегі жеке нөмірлерге жеткізіледі. Келесі ауысым басталғанша олар қонақүйде болады. Үй-іші, бала-шағасымен тек телефон арқылы сөйлесе алады. Ботагөз Сүлейменованың айтуына қарағанда, мұндағы жағдай өте жақсы көрінеді. Сонымен бірге ол дәрігерлерді қолдап, бір реттік костюмдер әперген Алла Писаренко басқаратын «Іскер әйелдер қауымдастығы» қоғамдық ұйымы мен дәмді тағамдар жеткізіп отырған Сайран Хамзин басқаратын «Рестораторлар қауымдастығы» қоғамдық ұйымына да алғыс айтты.

Қазір инфекциялық бөлімшенің медициналық қызметкерлері наурыз айының қосымша ақысын да толық алды. Бұл да ақ желеңді жандардың еңбегін ынталандыра түсуге зор ықпал етіп отыр.

 

ПЕТРОПАВЛ

 

Соңғы жаңалықтар

Атырауда 9 баланы ит талады

Аймақтар • Бүгін, 19:57

Ұқсас жаңалықтар