27 жастағы төрткүл дүниедегі теңдессіз теңбіл доп шеберлерінің бірі COVID-19 індетіне қарсы күреске өз үлесін қосу мақсатында Мысыр еліне 1 мың тонна азық-түлік пен тамақ жөнелтті. Осының алдында ғана ол Египеттегі ауруханаларға қаржылай көмек көрсеткен болатын.
Дүниежүзілік денсаулық сақтау ұйымы қазіргі кезде аталмыш мемлекетте 3 000-ға жуық адамның коронавирус дертіне шалдыққаны жөнінде мәлімет таратып отыр. Олардың 205-і қайтыс болса, 646-сы айығып шыққан.
Жалпы Мұхаммед Салах өз отандастарына қамқор қолын созудан ешуақытта тартынған емес. Өз Отанында ол спорт кешендері мен футбол алаңдарын, мектептер пен ауруханалар салды. Кедейшіліктің қамытын киген балалардың өмірдегі өз жолдарын табуға Мұхаммед үнемі жәрдемдесіп жүр.
Осы орайда мына бір жайтқа тоқталмай кетуге болмайды: 2017 жылы Египет үкіметі өздерінің ұлттық валютасын құнсызданудан сақтап қалу үшін әлемнің әр қиырында жүрген бай-қуатты азаматтардан мол көлемде қаражат сұрауға мәжбүр болды. Айтулы теңбіл доп шебері бұл ұсынысты ең бірінші болып қолдады. Мәрт Мұхаммед арада бір апта өтпей жатып, арнайы есепшотқа 210 мың британ фунтты көлемінде қаржы аударды.
