Бүгін, Солтүстік Каспийдегі «Қашаған» кен орнында мұнайдың алғашқы баррелін өндіру бастау алды. Бұл туралы «Норт Каспиан Оперейтинг Компани Б.В.» («НКОК») компаниясының баспасөз қызметі хабарлады. Бұған дейін «ҚазМұнайГаз» президенті Сауат Мыңбаев аталған кен орнынан алғашқы мұнай тамшыларын өндіру 9 қыркүйекте басталатынын мәлім еткен еді. Кейіннен Мұнай және газ министрі Ұзақбай Қарабалин «Қашаған» мұнайының сәл кейіндеу өндірілетінін жариялады.
Енді міне, көптен күткен «Қашағанның» мұнайы өндіріле бастады. Осылайша, Қазақстанның мұнай-газ өнеркәсібінің тарихында алғаш рет су астынан мұнай өндіру жылнамасы жазыла бастады. Еске сала кетейік, «Қашаған» –Солтүстік Каспийдегі аса ірі кен орны. Атыраудан оңтүстік-шығысқа қарай 80 шақырым қашықтықта орналасқан. Геологиялық қоры шамамен 35 миллиард баррелді құрайды.
Жолдасбек Шөпеғұл,
Атырау облысы.
