Кеше еліміздің Мемлекеттік хатшысы Марат Тәжин Америка Құрама Штаттарының Қазақстандағы Төтенше және өкілетті елшісі Кеннен Фэйрфаксты қабылдады.
Кеше еліміздің Мемлекеттік хатшысы Марат Тәжин Америка Құрама Штаттарының Қазақстандағы Төтенше және өкілетті елшісі Кеннен Фэйрфаксты қабылдады.
М.Тәжин АҚШ елшісін Қазақстандағы дипломатиялық миссиясының аяқталуымен және Атом энергиясы жөніндегі халықаралық агенттіктің атқарушы директорының орынбасары лауазымына тағайындалуымен құттықтады. Мемлекеттік хатшы К.Фэйрфакстың АҚШ-тың Қазақстандағы Төтенше және өкілетті елшісі ретінде жемісті еңбек еткенін, сондай-ақ, осы қызметке тағайындалған екі жылдың бір күндегідей сырғып өтіп кеткенін атап өте келе, мемлекетаралық байланыстарды жандандыруға қосқан үлесі үшін алғысын білдірді.
Кездесу барысында тараптар Қазақстан мен Америка арасындағы көпқырлы стратегиялық әріптестіктің жоғары деңгейін, екі мемлекет басшылары арасында достық қарым-қатынас қалыптасқанын атап өтті.
К.Фэйрфакс саяси және экономикалық әріптестікті ілгерілету, Қазақстан-АҚШ қарым-қатынасын одан әрі институттандыру бойынша бірлесе атқарылған жұмыстардың нәтижелеріне қанағаттанушылығын білдірді.
Кездесу соңында америкалық дипломат журналистерге сұхбат берді. «Біз көптеген мәселелерді, соның ішінде соңғы жылдары атқарылған жұмыстар шоғырын және осы жұмыстардың нәтижелерін талқыладық. Мәселен, кездесуде қауіпсіздік және лаңкестікке қарсы күрес жүргізу бағытында ынтымақтастық орнатудың жайы қаралды. Ядролық қаруды таратпау, әртүрлі жаһандық стратегиялық мәселелер төңірегінде Қазақстан мен АҚШ бір-біріне ұзақ жылдар бойы өзара қолдау танытып, ынтымақтастық орнатып келе жатқаны барлықтарыңызға белгілі. Бұған қоса, соңғы жылдары құқық саласында да тығыз әріптестіктің жолға қойылғанын атап өтуге болады. Мәселен, екі елдің құқық қорғау органдарының өкілдері терроризмге қарсы күрес саласында тәжірибе алмасып, тығыз қарым-қатынас орнатқан болатын», деді сөз орайында ол.
Сондай-ақ, К.Фэйрфакс екіжақты кездесу барысында соңғы уақытта Қазақстанда болған саяси оқиғалар мен іс-шаралардың және Қазақстанның демократиялық институттарды дамыту мен әлеуметтік даму мәселелері төңірегінде қолға алған жоспарларының талқыланғанын атап өтті.
«Менің АҚШ-тың Қазақстандағы Төтенше және өкілетті елшісі ретіндегі миссиямның мерзімі аяқталғанын білесіздер. Соған қарамастан, мен Қазақстанмен бүгінгі күнге дейін қалыптасқан тығыз байланыс жібін үзбей, жалғастыра беретін боламын. Дәлірек айтсам, ендігі кезекте Атом энергиясы жөніндегі халықаралық агенттікте қызмет атқара жүріп «Жасыл көпір», ЭКСПО-2017 жобалары бойынша екіжақты ынтымақтастықты жандандыруға айрықша назар аударатын боламыз», деді елші өз сөзінде.
Ләйла ЕДІҚЫЗЫ,
«Егемен Қазақстан».
