Ансамбль құрамындағы әртістер қобыз, қыл қобыз, нарқобыз, домбыра, сырнай, мүйіз сырнай, шаңқобыз, жетіген, шертер, дауылпаз, саз сырнай, бас домбыра, сыбызғы, су ағаш, тоқылдақ және тағы басқа қазақ халық аспаптарында ойнайды. Ұжымның көркемдік жетекшісі, мәдениет қайраткері Шолпан Қорғанбек: «Бұл кавер қазақтың дәстүрлі аспаптарының поп-арт өнерімен үйлесімділігінде бірегей болады» деп атап өтті.
Шолпан Қорғанбектің айтуынша, «Yesterday» әні қазақстандықтардың сүйікті әні және оны осындай ерекше орындауда тыңдау өте қызықты болады. Ұжым жетекшісі көркемдік міндеттерден басқа, түскен қаражат денсаулық сақтау жүйесіне – пандемиямен тікелей күресетін адамдарға көмекке жұмсалатынын және әйгілі британ музыканты Пол Маккартнидің ауқымды қайырымдылық акцияларын қолдайтынын атап өтті:
– Біз де ортақ іске өз үлесімізді қосамыз. Музыка осы бір қиын кезеңде бәрімізді біріктіреді және бізге үміт береді, – деп бөлісті Шолпан Қорғанбек.
Еске сала кетейік, көктемде «Қорқыт» ансамблі 75 шығарманы үзіліссіз орындап, Қазақстанның Гиннесс рекордтар кітабына енген болатын.
