Менің де күйеуім «Теңіз» кенішінде вахталық әдіспен жұмыс істеуші еді. Қазір бұл кен орнынан жұмысшылар тұрғылықты мекенжайына жіберіліп жатыр. Уақытша жұмыссыз қалғандардың арасында күйеуім де бар. Бұл әрине, отбасылық кірістің азаюына ықпал етері даусыз. Оның үстіне өзім жұмыс істемеймін. Отбасымызда мектеп жасындағы төрт баламыз бар. Бастапқыда алаңдағанымызды жасыра алмаймын. Осындай қиын кезде арқа сүйейтін мемлекетің болғаны қандай жақсы!
Ел Президенті Қасым-Жомарт Тоқаевтың уақытша жұмыссыз қалған жандарды қолдау үшін 42 500 теңгеден әлеуметтік төлем беруге ұйғарым жасағаны қуантты. Бұл көмекті жұмыссыздар да алуына болады екен. Арнайы желі арқылы мен де осы төлемді алуға өтініш бердім. Арада үш-төрт күн өткенде жеке есепшотыма әлеуметтік төлем қаржысы түсті. Шынымды айтсам, күйеуім жұмыс істеп, табыс тауып жүргенде әлеуметтік төлем алуға жүгінуді ойламаған едім.
Тегінде мұндай қолдау біз секілді жұмыссыз отырған жандардың ел келешегіне деген сенімін орнықтыра түседі. Ал жұмысынан уақытша шеттеп қалғандар жалақысы сақталатынына қуанып отыр. Біз мұны елдің келешегін ойлаған басшылардың тарапынан жасалған қамқорлық ретінде қабылдап отырмыз.
Айнұр ҚАЛАУОВА,
көп балалы ана
Атырау облысы,
Жылыой ауданы