Бұл бағытта Алматы облысында да тиісті шара қолға алынған. Есеп бойынша, өңірдегі 248 395 тұрғын коммуналдық қызмет шығыны үшін өтемақы алушылардың санатына кірген. Яғни, тұтынушының атында коммуналдық қызмет түрін пайдаланатынын растайтын есепшот болған кезде барлық шығын өтеледі. Коммуналдық қызметтер бойынша қаражатты өтеу үшін тұтынушы жеке сәйкестендіру нөмірін, әлеуметтік мәртебесін және есепшотының деректерін көрсете отырып, ақпараттық жүйе арқылы, болмаған жағдайда call-орталық арқылы өтінім береді. Өтінім алған күннен бастап бес жұмыс күнінен кешіктірмей тұтынушының есепшотына қаражат аударылады. Ал Үкімет тарапынан белгіленген көмек алатын арнайы санаттағы жеке тұлғалар тиісті орынға өтініш жазуы керек. Бұл топқа жататын азаматтардың бір айлық коммуналдық шығындарын өтеу үшін 15 мың теңге көлемінде төлем мөлшері белгіленген.
Жалпы, алдағы екі айдағы коммуналдық шығындарды өтеуді қаржыландыру үшін республикалық бюджеттен 7,5 млрд теңге қаражат қарастырылған. Ал облыс аумағындағы тұрғындарға түрлі меншіктегі 138 мекеме коммуналдық қызмет көрсетеді. Осылайша, Мемлекет басшысы Қасым-Жомарт Тоқаевтың коронавирус індетімен күресу және дағдарысқа қарсы қабылданған шараға орай берген тапсырмасы Алматы облысында нақты істе көрініс тауып отыр.
Айтпақшы, облыс тұрғындарының 1 сәуір мен 30 маусым аралығында тұтынған коммуналдық қызметі үшін алынатын ақы төменгі тарифпен есептелетін болды. Мұндай шешімді Ұлттық экономика министрлігі Табиғи монополияларды реттеу комитетінің Алматы облысы бойынша департаменті қабылдаған еді. Яғни, Талдықорған қаласындағы «Жетісу су құбыры» мекемесі таза судың 1 шаршы метрі үшін төленетін ақыны 8 пайызға төмендетсе, «Талдықорғанжылусервис» компаниясы 1 Гкал жылудың бағасын және ыстық су үшін алынатын ақыны да 10 пайызға арзандатты. Ал «Алматыгазсервис» холдингі облыстың Алматы қаласы маңындағы аудандарының тұрғындары тұтынатын газ бағасын 24,39 теңгеден 24,11 теңгеге дейін түсіреді. Сондай-ақ барлық аудандағы жылу, су, көгілдір отын және қуат көзін тарататын компаниялар аталған мерзім аралығындағы төлем тарифін 1 пайыздан 10 пайызға дейін төмендетіп, тұрғындарға жеңілдік жасауы тиіс. Және компаниялар төтенше жағдай кезеңіндегі берешек үшін тұрғын үй-коммуналдық қызметтерін тоқтатпайтын болды.
Алматы облысы
