Барша жұртшылық болып асыға күткен Мемлекет басшысының бүгінгі мәлімдемесін оқи отырып, осындай күрделі кезеңді ойдағыдай еңсерудегі жан-жақты зерделенген, батыл қадамдардың «көз көріп, қол ұстаған» әрбір нақты нәтижесі үшін кеудеңді зор мақтаныш сезімі кернейді.
Қасым-Жомарт Кемелұлының сараланған салмақты сөзін Ұлттық музей ұжымы әрі қуанышпен, әрі ыстық ықыласты қолдаумен қабылдады.
Бірден айту керек, мемлекетке деген ел сеніміне еш селкеу түсіп көрген емес, қайта қалың қауым болып карантинге байланысты қойылған әрбір талапты жоғары жауапкершілікпен орындап келеді.
Ежелден келе жатқан: «Апат айтып келмейді», деген сөз бар.Күллі әлемді дүрбелеңге салған індет, өкінішке қарай, мұны тағы бір дәлелдеп берді.
Дегенмен «қамданған қапы қалмайды» дегенге сүйенсек, тәжді тажал әлегі Тәуелсіз Қазақстанымыздың берік іргесін шайқалта алмады.
Қаншама ауыр соқса да – егемендіктің алғашқы жылдарынан бергі нық қалыптасқан ел басқару дағдысы, әлемді таңғалдырған жан-жақты жетістіктеріміз, бұл екеуіне – халқымыздың темірдей тәртіпке бағынған асыл қасиеті қосылып: кесірлі кеселдің зардабы кең көлемде тамыр жая алмады.
Төтенше жағдай кезінде Президент бастамасымен іске қосылған қолдаудың екі пакеті нәтижесінде көптеген азаматтар нақты жәрдемге қол жеткізді.
Президент айтқан: «Қоғамның әрбір мүшесі мемлекеттік қамқорлықтан тыс қалмайды», деген уәдеге күні бүгін қаржылай көмекке ие болған 4 миллион 250 мың адамның әрқайсысы куәгер бола алады.
Мұның сыртында кең байтақ еліміз бойынша қаншама ауқымды қайырымдылық шара атқарылып жатыр.
Қадери-халімізше біз де аянып қалмаймыз.
Шұғылалы шуаққа маңдайыңды тосып, кең көшеде емін-еркін адымдайтын күнге көп қалған жоқ.
Біздің бәріміздің біріккен күресіміз сол күнді жақындата түседі.
Арыстанбек МҰХАМЕДИҰЛЫ,
Қазақстан Республикасы Ұлттық музейінің директоры
