Саясат • 01 Мамыр, 2020

Елді сүйсінткен есті сөз

23 реткөрсетілді

Ақылды адамдар оқиғаның алдын алып, уақыттан озып жүреді. Әлемді әбігерге салған тәж-тажал бастала салысымен Қазақстан Президенті Қ.Тоқаев өзге біраз мемлекеттерден бұрын төтенше жағдайды шұғыл, дер кезінде жасап, Жаратқан ием жомарттықпен сыйлаған кемел ойлы кемеңгерлікпен өте дұрыс шешім қабылдады. Соның нәтижесінде тәж-тажалдың ауыр салдарын айтарлықтай жеңілдетті.

Осы қысылтаяң кездегі Мемлекет басшы­сының барлық іс-әрекеті, төтенше жағдайды 11 мамырға дейін созғаны да көптің көңілінен шықты. Енді, міне, екінші рет мәлімдеме жасап:

«Басты міндет – азаматтарымыздың денсаулығын сақтап, өмірін қорғап қалу.

Әлеуметтік және экономикалық тұрақ­ты­лықты қамтамасыз етіп, халықтың табысын сақтау үшін де арнайы шаралар қабылданып жатыр.

Тағы да қайталап айтамын: қазіргідей күрделі кезде әрбір азамат біздің назарымызда болады. Мемлекет ешкімді қиын­дықта қалдырмайды», дегені халықтың рухын көтерген ұлық сөз болды.

Ақтамберді айтқан:

Білімді туған жақсылар,

Аз да болса көппен тең, – деген осы!

«Жизнь достойна тех, кто борется за нее каждый день» депті Островский. Мемлекет басшысының мәлімдемелері бізге өмірден алынған осы ұлағатты сөзді ойымызға оралтып, бойымызға күш-қуат, «Төзім тілекке жеткізеді» деген арманымызға қанат бітірді.

Мәлімдемедегі әр сөйлемнен халыққа деген құрмет пен сүйіспеншіліктің жылы лебі есіп тұр.

Мемлекет басшысы былай дейді:

«Бұл дағдарыс бірлігі бекем, елін сүйетін отаншыл жұрт екенімізді көрсетті.

Қашанда осылай ұлт болып ұйыса білсек, барлық мақсатымызға қол жеткі­зе­міз. Оған ешқандай күмән жоқ.

Елдің қамы үшін бастаған ісіміз қайыр­лы болады деп сенемін! Халқымыз «Береке басы – бірлікте» дейді.

Жұдырықтай жұмылсақ, кез келген қиындықты жеңеміз!

Біз біргеміз!».

Иә, біз біргеміз, сызат түсіп сөгілмейді іргеміз!

«Тату елге – тыныштық пен тоқшылық нәсіп», депті Күлтегін.

Сүлеймен бақытты кезінде қолындағы жүзігінің астындағы: «Бәрі де өтеді», қиыншылық келгенде жүзіктің үстіндегі «Бұл да өтеді» деген жазуды оқиды екен.

Иә, бұл да өтеді.

Тойдың үлкені алда.

Аман болайық!

 

Сәбит ДОСАНОВ,

Мемлекеттік сыйлықтың лауреаты

 

АЛМАТЫ

 

Соңғы жаңалықтар

Ұқсас жаңалықтар