Мақтаарал ауданындағы Фердоуси және Нұрлы жол елді мекендеріне су басу қаупі төніп тұрғандықтан 3 мыңнан астам адам эвакуацияланды. Олар Мақтаарал ауданындағы Атакент кентінде орналасқан 10 мектепке орналастырылған. ТЖК жедел штабы және Түркістан облысының төтенше жағдайлар департаменті эвакуация жолдарының және зардап шеккен халықты қабылдау пунктілерінің орналасуын анықтауда. Республикалық деңгейде құрылған жедел штабты ТЖК басшысы Владимир Беккер басқарады. Штабтың хабарлауынша, төтенше жағдайдағы құтқару жұмыстарына Түркістан облысы, Шымкент қаласының Төтенше жағдайлар департаменттерінің, Ұлттық ұланның, Қорғаныс министрлігінің, аудандық полиция бөлімінің, жергілікті атқарушы органдардың 635 адамы мен 60 дана техникасы жұмылдырылған.
Қауіпсіз жерге көшірілген тұрғындар азық-түлік, ыстық тамақпен толық қамтамасыз етілген. Сондай-ақ эвакуацияланған халықты індеттен сақтау бойынша барлық шара қолға алынды. Тұрғындарға антисептик, бетперде, қолғап тегін таратылып, әр азаматтың дене қызуы тепловизормен тексерілуде.