Абай атындағы Қазақ ұлттық педагогикалық университетінің халықаралық байланыстары жылдан-жылға жедел қарқынмен даму үстінде. Италияның Болон қаласында Университеттердің Ұлы Хартиясына мүше болған оқу орны бүгінде әлемнің ондаған беделді университеттерімен әріптестік қатынас орнатып үлгерді.
Абай атындағы Қазақ ұлттық педагогикалық университетінің халықаралық байланыстары жылдан-жылға жедел қарқынмен даму үстінде. Италияның Болон қаласында Университеттердің Ұлы Хартиясына мүше болған оқу орны бүгінде әлемнің ондаған беделді университеттерімен әріптестік қатынас орнатып үлгерді.
Биыл мамыр айында аталмыш қара шаңырақтың қабырғасында Қазақ-қытай инновациялық орталығы ашылса, 17 қыркүйекте осы оқу орнында «Қазақстан – Сорбонна француз университетін» ашу туралы екі оқу орны басшылары Меморандумға қол қойды. Бұл рәсімге Францияның Франкофония жөніндегі министрі Ямина Бенгиги ханым бастаған Франция делегациясы келді. Делегация құрамында Париждегі Сорбонна университетінің Президенті Жан-Франсуа Жирар, аталған жобаның иесі белгілі жазушы, қоғам қайраткері Марек Халтер және Сорбонна университетінің оқытушы-профессорлары, франциялық журналистер болды. Қазақ-француз басқосуына Француз республикасының Қазақстандағы елшілігінің өкілдері қатысты.
ҚР Ұлттық Ғылым академиясының салтанат залында өткен Меморандумға қол қою рәсімін Абай атындағы ҚазҰПУ ректоры Серік Пірәлиев ашып, франциялық қонақтарды таныстырды.
– Абай атындағы Қазақ ұлттық педагогикалық университеті базасында «Қазақстан – Сорбонна француз университетін» ашу туралы екіжақты келісімшартқа қол қоюға жиналып отырмыз. Болашақта бұл университетте Қазақстан жастары французша оқып білім алады. Мұнда Сорбонна университетінің профессорлары дәріс оқып, біздің жастарымыздың Еуропалық білім кеңістігіне шығуына, білім берудің француздық инновациялық технологияларын игеруіне, ғалымдарымыздың бірлескен ғылыми жобаларды жүзеге асыруына қол жеткізуіне, сондай-ақ, Франция мен Қазақстан жоғары оқу орындары арасындағы әріптестікті нығайтуға мүмкіндік береді. Болашақта «Қазақстан – Сорбонна француз университетінде» Орталық Азия жастарының да білім алуына кең жол ашылады, – деп атап өтті С.Пірәлиев.
Алматы қаласы әкімінің орынбасары Зәуре Аманжолова франциялық қонақтарға Алматы қаласының экономикалық және әлеуметтік дамуы, білім беру саласындағы жетістіктері туралы айтып, қолға алынып отырған іске сәттілік тіледі.
Бұдан кейін ҚР Ұлттық ғылым академиясының үлкен залында екіжақты пікір алмасулар болды. С.Пірәлиев Француз Республикасының Франкофония жөніндегі министрі Ямина Бенгиги ханымға Абай атындағы Қазақ ұлттық педагогикалық университетінің құрметті профессоры дипломын тапсырып, профессор мантиясын жапты.
Алматыда Сорбонна университетінде оқу 2014 жылы басталады. Оған дейін дайындық шаралары өткізіледі. Франциядан оқытушылар тобы келіп, Абай атындағы ҚазҰПУ-да лекциялар циклін өткізеді, француз тілінде сабақ өткізу қолға алынады. Алғашқы жылдары маркетология, әлеуметтану, саясаттану, архитектура және дизайн мамандықтары бойынша мамандар даярлау қолға алынбақ.
Қанат ЕСКЕНДІР,
«Егемен Қазақстан».
АЛМАТЫ.